Shumë njerëz përpiqen të shmangin bisedat e zakonshme pranë aparatit të kafesë, në autobus apo në pritje te mjeku, duke menduar se do të jenë të sikletshme ose të mërzitshme. Por një studim i ri sugjeron të kundërtën: pikërisht këto biseda të vogla mund të kenë ndikim të madh në mirëqenien mendore dhe emocionale.
Hulumtimi, i publikuar në revistën “Journal of Personality and Social Psychology”, tregoi se njerëzit i nënvlerësojnë shpesh bisedat e zakonshme, ndërsa pas përfundimit të tyre ndihen më mirë dhe më të lidhur me të tjerët sesa kishin parashikuar.
Sipas studiuesve, edhe temat që duken “të mërzitshme” mund të krijojnë ndjesi afërsie dhe të ndihmojnë në uljen e vetmisë.
Këto momente janë të vogla, por jo të parëndësishme
-tha dr. Nicholas Allan, psikolog dhe profesor asistent në “Ohio State University”.
Studimi analizoi nëntë eksperimente me rreth 1.800 pjesëmarrës, të cilët u pyetën paraprakisht se sa interesante mendonin se do të ishin bisedat mbi tema si matematika, Lufta e Dytë Botërore, bursat, macet apo ushqimi vegan.
Megjithëse pjesëmarrësit prisnin që diskutimet të ishin të mërzitshme, shumica deklaruan më pas se kishin kaluar më mirë nga sa mendonin. Kjo ndodhte edhe kur të dy bashkëbiseduesit e konsideronin temën jo interesante.
Autorja kryesore e studimit, Elizabeth Trinh nga “University of Michigan”, shpjegoi se problemi qëndron tek pritshmëritë negative që njerëzit krijojnë para një bisede.
Shpesh supozojmë se temat si moti, rruga për në punë apo rutina e përditshme nuk do të jenë interesante. Por rezulton se vetë lidhja me personin tjetër është ajo që e bën bisedën të këndshme
-tha ajo.
Sipas studiuesve, elementi më i rëndësishëm nuk është tema, por mënyra si njerëzit përfshihen në komunikim.
Ndjenja se po dëgjohesh, shkëmbimi i pyetjeve dhe zbulimi i detajeve të papritura nga jeta e dikujt janë ato që krijojnë kënaqësi
-shpjegoi Trinh.
Ekspertët paralajmërojnë gjithashtu se shmangia e vazhdueshme e kontakteve sociale mund të rrisë ndjenjën e vetmisë, e cila lidhet me probleme serioze shëndetësore, si depresioni, ankthi, diabeti tip 2, sëmundjet e zemrës dhe madje rreziku për vdekje të parakohshme.
Vetmia nuk ka të bëjë vetëm me numrin e njerëzve që sheh, por me cilësinë e lidhjeve që krijon
-tha dr. Aron P. Brinen nga “Vanderbilt University Medical Center”.
Sipas specialistëve, edhe ndërveprimet e vogla të përditshme mund të ndikojnë pozitivisht në humor dhe shëndetin mendor, për sa kohë ato ndihen të respektueshme dhe emocionalisht të sigurta.
Në fund, ekspertët këshillojnë që njerëzit të mos i shmangin bisedat spontane, pasi ato mund të jenë më të vlefshme për mirëqenien emocionale sesa mendojnë.
