Pas më shumë se tri dekadash të suksesshme në skenë dhe ekran, aktorja e njohur australiane Cate Blanchett ka bërë të ditur se po shqyrton seriozisht largimin nga aktrimi.
Në një intervistë për “Radio Times”, fituesja e dy çmimeve Oscar u shpreh se ka dëshirë të ndjekë rrugë të tjera në jetë.
Familja ime më sheh me dyshim sa herë e them këtë, por kësaj here e kam me të vërtetë seriozisht. Dua të merrem me gjëra të tjera
Blanchett, 55 vjeçe, ka folur edhe më parë për lidhjen e saj të ndërlikuar me aktrimin, duke e përshkruar si një marrëdhënie dashurie që kërkon rinovim të vazhdueshëm.
Ajo ka theksuar gjithashtu se nuk ndihet rehat me famën dhe preferon të qëndrojë larg vëmendjes mediatike.
Pavarësisht kësaj, aktorja do të dëgjohet së shpejti në një projekt të ri radiofonik në BBC Radio 4, ku do të interpretojë një monolog 90-minutësh të titulluar “The Fever” nga Wallace Shawn, në rolin e një udhëtari të sëmurë në një vend të përfshirë nga lufta civile.
Gjatë karrierës së saj, Blanchett ka sjellë në ekran disa nga rolet më të paharrueshme në filma si “Elizabeth”, “The Lord of the Rings”, “The Aviator” dhe “Blue Jasmine”. Ajo ka fituar dhjetëra çmime ndërkombëtare dhe është konsideruar si një nga aktoret më të talentuara të gjeneratës së saj.
Së fundmi, ajo është përfshirë në projekte si seriali “Disclaimer” i Alfonso Cuarón dhe filmi “Black Bag” i Steven Soderbergh, ku luan përkrah Michael Fassbender.
Megjithëse nuk ka bërë një njoftim zyrtar për tërheqjen, deklaratat e saj të përsëritura lënë të kuptohet se Blanchett është gjithnjë e më e prirur të largohet nga aktrimi për të eksploruar horizonte të reja.
