Qumështi konsiderohet prej vitesh si një ushqim i rëndësishëm për organizmin, falë përmbajtjes së lartë të kalciumit, proteinave dhe vitaminave. Megjithatë, konsumimi i tepërt i tij mund të sjellë disa efekte anësore që shpesh neglizhohen. Ekspertët këshillojnë që çdo ushqim të konsumohet me ekuilibër dhe kjo vlen edhe për qumështin.
Një nga problemet më të zakonshme lidhet me intolerancën ndaj laktozës. Shumë të rritur kanë vështirësi në tretjen e laktozës, sheqerit natyral që gjendet në qumësht. Kjo mund të shkaktojë të përziera, parehati në stomak dhe në disa raste edhe të vjella pas konsumimit të produkteve të bulmetit. Simptomat ndryshojnë nga një person tek tjetri, por zakonisht shfaqen pak kohë pas pirjes së qumështit.
Gjithashtu, qumështi në sasi të mëdha mund të ndikojë negativisht në sistemin tretës. Fryrja, gazrat, ngërçet dhe diarreja janë disa nga shqetësimet më të zakonshme. Kur organizmi nuk arrin të tresë laktozën siç duhet, ajo fermentohet në zorrë dhe shkakton probleme me tretjen. Kjo ndodh jo vetëm tek personat intolerantë ndaj laktozës, por edhe tek ata që konsumojnë më shumë qumësht seç duhet.
Një tjetër efekt që lidhet shpesh me konsumimin e tepërt të qumështit është përkeqësimi i akneve. Disa studime sugjerojnë se hormonet dhe faktorët e rritjes që gjenden në qumësht mund të ndikojnë në balancën hormonale dhe të nxisin problemet e lëkurës. Në veçanti, qumështi i skremuar është lidhur me shtimin e akneve tek disa persona. Për këtë arsye, specialistët rekomandojnë konsum të moderuar dhe vëmendje ndaj reagimeve që trupi jep pas konsumimit të qumështit.
