Këngëtarja amerikane Chappell Roan (27 vjeç), e njohur për hitin “Pink Pony Club” dhe stilin e saj të veçantë, solli një surprizë të pazakontë gjatë festivalit “Summer Sessions” në Royal Highland Centre, Edinburg.
Para performancës, ajo krijoi një atmosferë unike duke sjellë një mini-kopsht zoologjik prapa skenës, ku kishte një poni, dy lopë Highland, katër këlyshë labrador dhe dy dhi.
Drag queen-i Shego Sinner, që performoi përkrah Chappell-it dhe ish-anëtares së “Little Mix”, Jade, e përshkroi idenë si “të çmendur, por të mrekullueshme”.
Në një video të publikuar në Instagram, Shego rrëfeu se kafshët i bënë të gjithë artistët të ndiheshin më të relaksuar e të gëzuar para daljes në skenë.
Edhe pse ishte hera e parë që përballej me një publik kaq të madh, Shego pranoi se emocionet e saj u zhdukën sapo nisi performanca, duke u ndjerë e mirëpritur nga audienca skoceze.
Ndërsa në skenë Chappell u shfaq e fuqishme dhe plot vetëbesim, prapa saj ajo ishte më e rezervuar e madje e turpshme, duke treguar respekt dhe njohje për të gjithë artistët pjesëmarrës.
Këngëtarja, e cila identifikohet si lezbike dhe shpesh përçon mesazhe feministe në tekstet e saj, ka qenë këtë vit në qendër të vëmendjes edhe për komentet e saj mbi nënat e reja në moshën e saj.
Mini-kopshti i improvizuar u bë mënyra e veçantë e Roan për të përballuar emocionet e një skene të madhe dhe për të sjellë një prekje origjinale në performancën e saj në Skoci.
