Kryetari i Kuvendit, Niko Peleshi sot ka ftuar në një takim konsultues shefat e grupeve parlamentare për të diskutuar mbi formimin e organeve të reja të Parlamentit. Takimi zhvillohet në orën 11:00 dhe në fokus ka përzgjedhjen e anëtarëve të delegacioneve, Byrosë së Kuvendit e Këshillit për Mandatet dhe Rregulloren.
Peleshi do t’u prezantojë palëve edhe një draft për ndryshimin e shpejtë të Rregullores së Kuvendit, që do t’i hapë rrugë rikonceptimit të Komisioneve Parlamentare, sipas modelit të propozuar nga kryeministri Edi Rama në Asamblenë e Partisë Socialiste më 11 shtator, ku edhe zbuloi kabinetin e ri qeveritar.
Plani i maxhorancës parashikon që ditën e nesërme, Kuvendi të mblidhet paradite për ngritjen e Këshillit të Mandateve dhe pasdite të votojë rregulloren e re e përbërjen e komisioneve. PS-ja ka mbajtur 7 komisione dhe opozita 4, duke e përjashtuar këtë të fundit nga Komisioni për Integrimin Europian, një strukturë që demokratët e konsiderojnë “strategjike”. Por, opozita nuk i ka votat për të bllokuar ndryshimet, të cilat miratohen me 71 vota.
Pas ristrukturimit të Parlamentit, Kuvendi do të zhvillojë një debat dy-ditor të enjten dhe të premten, për programin qeverisës e përbërjen e kabinetit “Rama 4”.
KOMISIONET NËN DREJTIMIN E PS-së:
Ekonominë, Punësimin dhe Financat
Çështjet Ligjore dhe Administratën Publike
Çështjet e Brendshme dhe të Mbrojtjes
Burimet Natyrore, Infrastrukturën dhe Zhvillimin e Qëndrueshëm
Bujqësinë, Ushqimin dhe Zhvillimin Rural
Evropa dhe Punët e Jashtme
Nismat qytetare, Bashkëpunimin dhe Mbikëqyrjen institucionale
KOMISIONET NËN DREJTIMIN E PD-së:
Edukimin, Shkencën dhe sportet
Shëndetësinë dhe Mirëqenien Sociale
Të Drejtat e Njeriut dhe Mjetet e Informimit Publik
Kulturën, Turizmin dhe Diasporën
