Ish-aktori i Nickelodeon, Tylor Chase, 36 vjeç, po kalon një periudhë alarmante, pasi u rikthye sërish në rrugë vetëm pak ditë pas një qëndrimi të detyruar 72-orësh në një spital psikiatrik.
Sipas ish-bashkëaktorit të tij Shaun Weiss, Chase u pa duke përdorur metamfetaminë në kushte ekstreme, në mot të ftohtë dhe pa veshje të përshtatshme.
Chase ishte shtruar në spital javën e kaluar pas një ndërhyrjeje nga influencuesi Jacob “Jake” Harris, mik i Weiss, i cili e gjeti aktorin në një gjendje të rrezikshme për veten. Megjithatë, sipas Weiss, ai u lirua para kohe nga qendra psikiatrike pa u njoftuar miqtë apo familjarët.
Ata duhej ta transportonin drejt një qendre detoksifikimi, por e lanë të largohej i vetëm”
-tha Weiss për TMZ. Më pas, Harris e gjeti sërish Chase në rrugë, ku ai po përdorte drogë, dhe u detyrua të kontaktonte për herë të dytë ekipin e krizës.
Sipas Weiss, gjatë vlerësimit të dytë, Chase po “pinte metamfetaminë në të ftohtë, pa këpucë dhe pa xhaketë”, një situatë që ka ngritur shqetësime serioze për jetën e tij.
Ai ka qenë në kontakt me Screen Actors Guild dhe autoritetet lokale për të gjetur zgjidhje, por thekson se edhe ndihmat financiare nga fansat nuk janë të mjaftueshme për një rikuperim real.
Tylor Chase, i njohur për rolin e Martin Qwerly në serialin “Ned’s Declassified School Survival Guide”, është parë së fundmi duke fjetur jashtë, duke tronditur publikun dhe kolegët e tij. Aktori Daniel Curtis Lee madje e ndihmoi duke e strehuar përkohësisht në një hotel.
Pavarësisht përpjekjeve të miqve dhe autoriteteve për t’i ofruar ndihmë, strehim dhe trajtim, Chase ka refuzuar shpesh mbështetjen, duke e bërë situatën edhe më të rëndë dhe shqetësuese për të gjithë ata që po përpiqen ta ndihmojnë.
