Nëse aplikoni për punë në kompaninë e pijeve Olipop, themeluesi dhe drejtori ekzekutiv Ben Goodwin nuk do t’ju punësojë nëse nuk bindet që jeni realisht të apasionuar pas punës që do të bëni. Për të, mungesa e motivimit është një sinjal i qartë paralajmërues.
Duhet të kenë zjarr brenda vetes. Duhet të jenë të motivuar.
Sipas Goodwin, pasioni për punën ka efekt zinxhir: sa më shumë e do atë që bën, aq më shumë e mbron misionin e kompanisë dhe përpiqesh të përmirësohesh, në dobi të vetes dhe të ekipit.
Mes pasionit dhe aftësisë teknike, fiton gjithmonë pasioni. Nëse ke pasion të vërtetë, aftësitë i mëson.
Por paralajmëron: pasioni nuk duhet të kalojë në ego.
Nuk mund të punësojmë njerëz që e vendosin egon e tyre mbi misionin e ekipit.
Edhe drejtues të tjerë mendojnë njësoj. Ja cilët janë “flamujt e kuq” që përmendin:
Mungesa e empatisë dhe bujarisë
Bill Phelps, CEO i zinxhirit amerikan Dave’s Hot Chicken, nuk toleron njerëz “toksikë”.
Një punonjës toksik është ai që nuk ka ndjeshmëri apo bujari dhe kjo sjellje përhapet te të tjerët.
Ndërkohë, punonjësit që ndihmojnë të tjerët krijojnë lidhje më të forta profesionale e kanë më shumë gjasa të ngjiten në karrierë.
Kur je jashtëzakonisht bujar, gjithçka të kthehet mbrapsht. Bujaria nuk të zbraz xhepat, përkundrazi, i mbush.
Phelps shton se edhe pse nuk gëzohet kur duhet të largojë dikë nga puna, ndonjëherë është e domosdoshme për të ruajtur kulturën e kompanisë.
Nuk jam krenar kur pushoj njerëz, por jam krenar për një kulturë pune të jashtëzakonshme.
Marrja e gjithë meritës për vete
Një tjetër tipar negativ për Monica Cepak, CEO e kompanisë shëndetësore Wisp, është punonjësi që mendon se mund t’i zgjidhë të gjitha problemet vetëm. Për ta shmangur këtë gjatë intervistave, pyet kandidatët:
Cili është problemi më i vështirë që ke zgjidhur në punë dhe si arrite te zgjidhja?
Nëse përgjigjja është “E bëra gjithçka vetë”, Cepak e kupton menjëherë që ai person nuk di të punojë në ekip.
Ne jemi një ekip dhe aftësia për të bashkëpunuar është thelbësore.
Kandidatët më të mirë janë ata që përmendin punën e përbashkët dhe pranojnë se nuk i kanë të gjitha përgjigjet, por janë të gatshëm të kërkojnë ndihmë e të bashkëpunojnë.
Do të habiteni sa shumë njerëz përdorin vetëm fjalën ‘unë’. Nëse nuk dëgjoj asnjëherë ‘ne’, kjo është zakonisht një shenjë e keqe. / shqip.al
