Aktori i njohur hollywoodian, Dwayne “The Rock” Johnson, ka hedhur poshtë raportimet se humbja e peshës së tij të fundit lidhet me rolin në filmin The Smashing Machine.
Gjatë një interviste në Festivalin Ndërkombëtar të Filmit në Toronto, 53-vjeçari zbuloi se transformimi i tij fizik ishte në funksion të projektit tjetër, filmit Lizard Music, me regji nga Benny Safdie.
Jam shumë i emocionuar sepse kam mundësinë, shpresoj, të transformohem përsëri siç bëra në The Smashing Machine. Mezi pres. Jam në procesin e humbjes së peshës. Kam një rrugë të gjatë përpara
-tha Johnson, duke shtuar me humor se këtë herë dieta e tij përfshin “më pak mish pule”.
Ndërkohë, për rolin e luftëtarit të MMA-së në The Smashing Machine, atij iu desh të shtonte masë muskulore shtesë, një ndryshim i kundërt me atë që po kalon aktualisht.
Aktori tërhoqi vëmendje muajin e kaluar në Festivalin e Filmit në Venecia, ku u shfaq dukshëm më i dobët, duke ndezur spekulime për shëndetin dhe përgatitjet e tij.
Johnson nuk është i ri në transformime të tilla: edhe për filmin superheroik Black Adam (2023), ai pranoi se kishte ndjekur një regjim të rreptë ushqimor dhe stërvitor, ndryshe nga çdo projekt tjetër i karrierës së tij.
