Është publikuar traileri i episodit special “Hannah Montana 20th Anniversary Special”, ku në qendër të vëmendjes rikthehet ylli i serialit, Miley Cyrus. Episodi do të transmetohet më 24 mars, saktësisht 20 vjet pas premierës së serialit në Disney Channel.
Sipas njoftimit të Disney, episodi special do të përfshijë pamje të papublikuara më parë, momente prapa skenave dhe rikthimin e disa prej melodive më të njohura të serialit.
Xhirimet do të realizohen para një audience live në studio dhe do të përfshijnë edhe një intervistë me Cyrus, të moderuar nga prezantuesja e podcast-it Call Her Daddy, Alex Cooper.
Seriali Hannah Montana u shfaq për herë të parë në vitin 2006 dhe u transmetua për katër sezone deri në vitin 2011, duke marrë katër nominime për çmimin Primetime Emmy Awards në kategorinë e programit më të mirë për fëmijë.
Historia ndiqte adoleshenten Miley Stewart, e cila jetonte në Malibu të Kalifornisë dhe mbante një jetë të dyfishtë: gjatë ditës ishte një vajzë e zakonshme, ndërsa në fshehtësi ishte këngëtarja e famshme pop Hannah Montana.
Suksesi i madh i serialit çoi edhe në realizimin e filmit Hannah Montana: The Movie, i cili u publikua në kinema në prill të vitit 2009.
Në kastin kryesor bënin pjesë edhe Emily Osment si Lily Truscott, Mitchel Musso si Oliver Oken, si dhe babai i Miley-t në jetën reale, Billy Ray Cyrus, në rolin e babait të saj në serial.
Gjatë viteve të transmetimit, në serial u shfaqën edhe shumë të ftuar të njohur, përfshirë Dolly Parton, Selena Gomez, Jonas Brothers dhe Dwayne Johnson.
