Sir Elton John ka reaguar ndaj spekulimeve se po planifikon një koncert hologramik në stilin e grupit ABBA, pas lajmeve për regjistrimin e një marke tregtare që përfshin holograme dhe përvoja virtuale 3D.
Burime pranë artistit 78-vjeçar theksuan se nuk ka plane për një projekt të tillë, duke kujtuar se Elton e ka refuzuar idenë edhe më parë, madje duke e quajtur veten “Luddit” — një person që shmang teknologjinë moderne.
Legjenda e muzikës, e cila sapo ka përfunduar turneun e lamtumirës “Farewell Yellow Brick Road”, mori pjesë së fundmi në funeralin privat të mikut të tij të ngushtë, Ozzy Osbourne.
Në një homazh prekës, ai e përshkroi Ozzy-n si “një pionier të madh dhe një nga njerëzit më qesharakë që kam takuar ndonjëherë”.
Muajin e kaluar, Elton John festoi 35 vjet pa alkool, një arritje që e kremtoi me familjen dhe një mesazh mirënjohjeje për fansat në rrjetet sociale.
Ai ka treguar hapur për betejat me varësinë ndaj drogës dhe alkoolit, duke pranuar se këto e vunë në rrezik jetën dhe karrierën, por rehabilitimi në vitet ’90 i ndryshoi përgjithmonë rrugën.
