Nicola Peltz ka zgjedhur ta nisë Vitin e Ri me një mesazh të fortë dhe domethënës, duke lavdëruar publikisht bashkëshortin e saj, Brooklyn Beckham, në një moment kur raportimet flasin për një shkëputje të plotë të tij nga prindërit, David dhe Victoria Beckham.
Aktorja dhe trashëgimtarja miliardere, 30 vjeçe, ndau në Instagram Story disa imazhe me njerëzit më të afërt të saj, të shoqëruara me mesazhin:
Shumë mirënjohëse që e nis Vitin e Ri me këta njerëz të mrekullueshëm
Mes personave të etiketuar binte dukshëm në sy Brooklyn, 26 vjeç, duke përforcuar idenë se çifti po distancohet gjithnjë e më shumë nga familja Beckham.
Në një nga fotot, Nicola dhe Brooklyn shfaqen të përqafuar në perëndim të diellit, në një ambient që besohet të jetë Florida. Me palma në sfond dhe qiell portokalli pastel, çifti dukej i qetë dhe i lumtur, duke reflektuar unitet dhe afërsi mes tensioneve familjare që po vazhdojnë prej muajsh.
Nicola etiketoi gjithashtu vëllain e saj Bradley, partneren e vëllait Zach Peltz, Aislinn Carne, si dhe disa miq të ngushtë, duke e bërë të qartë se në fillim të vitit të ri prioritet mbetet rrethi i saj i zgjedhur dhe bashkëshorti.
Në një tjetër postim, ajo ndau një foto ku shfaqet bashkë me Brooklyn dhe vëllain e saj Bradley në të njëjtin vend, duke nënvizuar edhe një herë fokusin e saj tek familja që ajo ka krijuar vetë. Ndërkohë, është vënë re se Nicola ka çaktivizuar komentet në postimet e saj të dy ditëve të fundit.
Postimi erdhi në një kohë kur mediat raportuan se Brooklyn u kishte thënë miqve se marrëdhënia e tij me prindërit ishte “e përfunduar”, pas muajsh tensionesh që kulmuan me bllokimin e David dhe Victoria Beckham në Instagram.
Ndërsa familja Beckham festoi ndërrimin e viteve në rezidencën e tyre në Cotswolds, Brooklyn dhe Nicola e pritën Vitin e Ri në Floridën Jugore, ku festuan në një klub të njohur në Miami dhe ndoqën performancën e reperit 50 Cent.
Edhe pse David Beckham publikoi në rrjetet sociale foto nostalgjike familjare, përfshirë një imazh të Brooklyn-it adoleshent, burime pranë familjes kanë pohuar se gjestet nuk arritën të zbusin përçarjen.
Sipas një burimi për The Mirror, Brooklyn ruan ende marrëdhënie të ngrohta me gjyshërit e tij, pavarësisht distancimit nga prindërit. Ndërkohë, David dhe Victoria Beckham raportohet se nuk kanë hequr dorë nga shpresa për një pajtim me djalin e tyre dhe vazhdojnë të shprehin publikisht dashurinë për të.
Në postimin e tij për Vitin e Ri, David Beckham shkroi krah një fotoje me Brooklyn-in:
Ju dua shumë
-ndërsa Victoria e rishpërndau imazhin me një emoji zemre, një tjetër përpjekje për të ndërtuar ura në një marrëdhënie të tronditur.
