Romeo Beckham ka ngjallur kureshtje dhe spekulime mes ndjekësve pasi publikoi një postim enigmatik në Instagram, ku shfaqet pa bluzë duke ekspozuar tatuazhet e tij në një ambient që duket si studio tatuazhesh.
Modeli 23-vjeçar, i cili ka bashkëpunuar më herët me marka prestigjioze si Puma, Burberry dhe Yves Saint Laurent, ndau gjithashtu një pamje nga një llogari e re në Instagram me emrin “Intra”, e shoqëruar me përshkrimin intrigues “play everywhere”.
Pa dhënë detaje të tjera, Romeo e shoqëroi postimin me mbishkrimin “Swipe”, një shigjetë, fjalën “soon” dhe emoji-n e rërës së orës, duke lënë të kuptohet se diçka e re po vjen shumë shpejt.
Pamjet e fundit e tregojnë Romeon në formë të shkëlqyer fizike, me pantallona sportive dhe kapelë, ndërsa nxjerr në pah koleksionin e tij prej mbi 70 tatuazhesh.
Së fundmi, ai ka shtuar disa të rinj, përfshirë simbolin 11:11 pas veshit dhe figura të reja në krah e kyçin e këmbës.
Postimi vjen në një moment delikat për familjen Beckham, pasi mediat britanike raportojnë për përkeqësimin e marrëdhënieve me vëllain e madh, Brooklyn.
Sipas burimeve pranë familjes, Brooklyn dyshohet se ka bllokuar prindërit dhe vëllezërit në Instagram, duke thelluar më tej përçarjen familjare. Një pretendim që është konfirmuar publikisht edhe nga vëllai i vogël, Cruz.
Ndërsa drama familjare vazhdon të jetë në qendër të vëmendjes, Romeo duket se po fokusohet te karriera dhe projekte të reja personale.
A është “Intra” një biznes i ri, një markë apo diçka krejt tjetër? Përgjigjja, siç la të kuptohet vetë Romeo, do të vijë “së shpejti”.
