Aktorja e famshme Jennifer Lawrence ka treguar një anë të rrallë dhe të ndjeshme të jetës së saj personale, duke rrëfyer për herë të parë periudhën e vështirë që kaloi pas lindjes së fëmijës së dytë.
Në një intervistë për revistën prestigjioze “The New Yorker”, Lawrence zbuloi se ka përjetuar muaj të tërë ankthi, pasigurie dhe frike të thellë gjatë ditëve të para të mëmësisë.
Sa herë që foshnja flinte, mendoja se kishte vdekur
– rrëfeu aktorja, duke treguar se ndjenjat e frikës dhe stresit e shoqëronin çdo moment të saj si nënë e re.
Lawrence pranoi se shpesh ndjente faj, duke dyshuar në aftësitë e veta prindërore.
Mendova se ai qante sepse nuk i pëlqente jeta, ose unë. Isha e bindur se do t’i shkatërroja fëmijët e mi
– tha ajo me sinqeritet.
Aktorja u shpreh se kjo përvojë e ndihmoi të kuptojë më thellë vështirësitë emocionale me të cilat përballen shumë gra pas lindjes, përfshirë depresionin postnatal dhe ndjenjat e izolimit.
Kjo periudhë, sipas saj, u kthye edhe në një përgatitje shpirtërore për rolin e ri në filmin “Die, My Love”, ku ajo interpreton një grua që kalon të njëjtat sfida psikologjike pas lindjes.
Pas lindjes, gjithçka ndryshon. Është një periudhë e pasigurt, e lodhshme, por që të bën më të fortë dhe më të vetëdijshme për veten
– përfundoi Lawrence.
Me këtë rrëfim të ndjerë, ylli i Hollywood-it ka sjellë sërish në qendër të vëmendjes një temë shpesh të heshtur – shëndetin mendor të grave pas lindjes.
