Kevin Federline, ish-bashkëshorti i këngëtares Britney Spears, ka bërë disa zbulime të bujshme në librin e tij të ri me titull “You Thought You Knew”, i cili do të publikohet më 21 tetor.
Në një fragment të botuar nga “USA Today”, Federline tregon për një episod të supozuar tradhtie që, sipas tij, ndodhi në fillimet e marrëdhënies së tyre dhe e tronditi thellë.
Ngjarja, sipas Federline, ka ndodhur gjatë një turneu të Britney në Amsterdam. Ai rrëfen se një mbrëmje, ndërsa Spears kishte dalë me valltaret dhe pjesëtarët e stafit, ai ishte kthyer më herët në hotel — dhe aty kishte parë një skenë që nuk do ta harronte kurrë.
Një grua tjetër ishte ulur në skajin e shtratit. Britney qëndronte midis këmbëve të saj, me duart mbi fytyrën e saj, dhe ato po putheshin. Plotësisht po putheshin
-shkruan Federline, duke shtuar se në atë moment ishte mbetur “i ngrirë dhe i tronditur”.
Ai tregon se menjëherë kishte nisur të mblidhte gjërat për t’u kthyer në Shtetet e Bashkuara, duke ndier se marrëdhënia e tyre nuk mund të vazhdonte më.
Sipas tij, Spears i kishte kërkuar falje dhe i kishte premtuar se një gjë e tillë nuk do të përsëritej.
Kevin Federline dhe Britney Spears u martuan në vitin 2004 dhe u divorcuan në vitin 2007, pas një periudhe shumë të komentuar në media.
Ata kanë dy djem — Sean Preston, 20 vjeç, dhe Jayden James, 19 vjeç — të cilët janë rritur kryesisht nën kujdesin e Federline.
Britney Spears, nga ana tjetër, për shumë vite ka qenë nën kujdestarinë ligjore të babait të saj, Jamie Spears, një periudhë që zgjati plot 13 vjet dhe përfundoi përfundimisht në vitin 2021, pas një vendimi gjyqësor që e liroi nga kontrolli ligjor.
