Dy vëllezër në kërkim për kultivim kanabisi u arrestuan në Shkodër. U prangosën në kuadër të operacionit të koduar “Sheldija”, si autorë të dyshuar të kultivimit të 400 bimëve narkotike. Në prill të këtij viti, Gjykata e Shkodrës iu caktoi masën e sigurisë “Arrest me burg”.
Specialistët për Hetimin e Krimeve të Komisariatit të Policisë Shkodër, në vijim të një hetimi të ndjekur me metoda proaktive dhe në bashkëpunim me Prokurorinë, siguruan informacion dhe prova për autorët e dyshuar të bimëve narkotike në fshatin Sheldi.
Bazuar në këto prova, Gjykata caktoi masën e sigurisë “Arrest në burg” për dy vëllezër.
Në kuadër të operacionit policor të koduar “Sheldija”, u kapën dhe u vunë në pranga:
E. F., 28 vjeç dhe M. F., 20 vjeç, banues në fshatin Sheldi.Nga hetimi dhe veprimet në terren, rezulton se E.F. dhe M.F. dyshohen si autorë të kultivimit të 400 bimëve narkotike, të zbuluara nga shërbimet e Policisë gjatë operacionit kombëtar të koduar “Koordinata”, më datë 29 prill 2025, në fshatin Sheldi.
Materialet procedurale i janë kaluar Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme.
