Lewis Capaldi ka folur hapur për diferencat mes artisteve femra dhe meshkujve në industrinë e muzikës, duke nxjerrë në pah sfidat me të cilat përballen gratë në skenë.
Në një intervistë për podcastin “Creativo” më 11 gusht, këngëtari skocez 28-vjeçar theksoi se artistet shpesh përballen me një “shkop më të lartë matës” dhe një analizë më të ashpër krahasuar me kolegët e tyre meshkuj.
Duke diskutuar mbi rikthimin e muzikës pop, Capaldi përmendi emra si Chappell Roan, Sabrina Carpenter dhe Olivia Rodrigo, duke i cilësuar si udhëheqëse të valës së re dhe si krijuese të muzikës më interesante të momentit.
Ai shtoi se performancat e artisteve femra zakonisht janë më të menduara dhe të kompletuara, ndërsa shumë burra – përfshirë edhe vetë atë – shpesh mjaftohen me një veshje të thjeshtë në skenë.
Një artiste femër nuk do të lejohej të këndonte në skenë me një T-shirt dhe pa bërë kujdes në detaje
-tha Capaldi, duke e cilësuar këtë situatë si të padrejtë.
Megjithatë, këngëtari përmendi disa përjashtime si Harry Styles, Benson Boone dhe Conan Gray, të cilët tregojnë më shumë teatralitet dhe kujdes në performancat e tyre.
Capaldi u rikthye këtë vit në skenë pas një pauze dyvjeçare për shkak të ankthit dhe sindromës Tourette, duke mahnitur publikun në festivalin Glastonbury 2025.
Është kaq mirë të jem sërish këtu
-tha ai me emocion, duke shtuar se dëshironte të fliste pak për të mos shpërthyer në lot.
Mesazhi i Capaldi-t shërben si një reflektim mbi presionin e madh me të cilin përballen gratë në industrinë e muzikës dhe nevojën për të njohur kontributin e tyre në formësimin e kulturës pop.
