Filmi i ri “Moana” ka debutuar në krye të arkëtimeve të fundjavës në Shtetet e Bashkuara dhe Kanada, por rezultatet e tij financiare janë konsideruar më të ulëta nga sa pritej për një nga projektet më të mëdha të Disney-t.
Gjatë ditëve të para në kinema, filmi arkëtoi rreth 37 milionë euro në Amerikën e Veriut dhe 44 milionë euro të tjera në tregjet ndërkombëtare, duke e çuar totalin global në afro 81 milionë euro.
Megjithëse bëhet fjalë për një nisje solide, shifrat mbeten larg pritshmërive për një produksion me buxhet rreth 213 milionë euro. Filmi nuk ka arritur të përsërisë suksesin e versionit të animuar të vitit 2016 apo të vazhdimit të tij, i cili kaloi shifrën e një miliard dollarëve në arkëtime në mbarë botën.
Në versionin e ri rikthehet Dwayne Johnson në rolin e Mauit, ndërsa aktorja e re Catherine Laga’aia debuton si Moana. Interpretimi i saj është vlerësuar pozitivisht, por kjo nuk ka mjaftuar për të bindur kritikët.
Shumë recensues e kanë cilësuar filmin si një version pa risi, duke argumentuar se nuk arrin të sjellë magjinë dhe freskinë që karakterizoi filmin origjinal.
Kjo reflektohet edhe në platformën Rotten Tomatoes, ku “Moana” ka marrë vetëm 34 për qind vlerësim nga kritikët.
Nga ana tjetër, publiku është shfaqur më i kënaqur me filmin, ndërsa analistët e industrisë besojnë se në rezultatin e debutimit ka ndikuar edhe konkurrenca e fortë nga filmat e tjerë familjarë që po shfaqen aktualisht në kinematë botërore.
