Një moment i vetëm gjatë ceremonisë së ndarjes së çmimeve Grammy ka mjaftuar që Billie Eilish të kthehet në qendër të një debati të ashpër politik dhe shoqëror. Komentet e saj nga skena kanë shkaktuar reagime të forta në rrjetet sociale, duke hapur diskutime të zjarrta mbi emigracionin, pronësinë e tokës dhe rolin e artistëve në çështjet publike në Shtetet e Bashkuara.
Gjatë marrjes së çmimit Grammy për Këngën e Vitit me “Wildflower”, këngëtarja bëri një deklaratë që u interpretua menjëherë si një kritikë e drejtpërdrejtë ndaj politikave amerikane të emigracionit.
Askush nuk është i paligjshëm në tokë të vjedhur
-u shpreh ajo nga skena, një fjali që u shpërnda me shpejtësi në rrjete dhe ndezi polemika.
Eilish, e cila prej vitesh ka qenë një kritike e hapur e Agjencisë për Zbatimin e Ligjit të Emigracionit dhe Doganave (ICE), shfrytëzoi momentin për të bërë thirrje për aktivizëm qytetar.
Ajo foli për nevojën e protestës, angazhimit dhe ngritjes së zërit në një periudhë që, sipas saj, është e paqartë dhe e vështirë për shumë njerëz. Një shprehje e ashpër kundër ICE, e thënë gjatë fjalimit, nuk u transmetua nga mediat.
Qëndrimet e saj nuk janë të reja. Pas vrasjes së Renee Good në Minneapolis, e cila u qëllua për vdekje nga një oficer i ICE, Eilish e quajti agjencinë një “grup terrorist të financuar nga shteti”, duke shkaktuar reagime të forta edhe atëherë. Ajo u bëri thirrje publike figurave të tjera të njohura që të reagojnë pas një tjetër rasti të ngjashëm, duke i kritikuar për heshtjen e tyre.
Pas deklaratave në Grammy, edhe moderatori i ceremonisë, Trevor Noah, nuk i shpëtoi ironisë, duke bërë një koment me nota satirike për situatën politike nga skena.
Por vala më e madhe e reagimeve shpërtheu në rrjetet sociale. Shumë përdorues e kritikuan Eilish-in, duke e akuzuar për hipokrizi, veçanërisht pas deklaratës së saj për “tokën e vjedhur”.
Disa shkuan edhe më tej, duke sugjeruar që ajo të dorëzojë shtëpinë e saj luksoze në Los Angeles një fisi të amerikanëve vendas ose një familjeje emigrantësh pa dokumente.
Po sikur thjesht të shkonim të gjithë në vilën e saj dhe të thoshim se do të jetonim aty? Është tokë e vjedhur, apo jo?
-shkruhej në një postim që u shpërnda gjerësisht në platformën X.
Reagime të forta erdhën edhe nga figura publike konservatore. YouTuber-i Brandon Tatum ironizoi stilin e jetesës së këngëtares, duke theksuar kontrastin mes deklaratave të saj politike dhe jetës luksoze në Hollywood Hills, të shoqëruar me siguri private dhe privilegje.
Deklaratat e Billie Eilish në Grammy kanë ndarë publikun në dy kampe të qarta: ata që e shohin si një zë të guximshëm kundër padrejtësive dhe ata që e akuzojnë për aktivizëm selektiv. Një gjë është e sigurt: një fjali e thënë nga skena mjaftoi për të kthyer një mbrëmje muzikore në një betejë politike kombëtare.
