Sebastian Siemiatkowski, CEO i “Klarna”, ka bërë disa deklarata tronditëse rreth ndikimit të inteligjencës artificiale (AI) në punë, duke thënë se kompania ka ndaluar rekrutimin e punonjësve të rinj, sepse AI mund të kryejë tashmë të gjitha detyrat që bëjnë njerëzit. Ai e përshkroi këtë si një çështje se si të përdoret dhe aplikohen këto teknologji, duke sugjeruar se shumë nga pozicionet e punës tashmë mund të zëvendësohen me AI.
Në një intervistë për Bloomberg TV, Siemiatkowski tha se gjatë vitit të kaluar, “Klarna” ka ndërprerë rekrutimin dhe ka shkurtuar nga 4,500 punonjës në 3,500, për shkak të largimeve të vetë punonjësve. Ai shpjegoi se shumë punonjës largohen pas pesë vitesh pune dhe, duke mos punësuar më, kompania po zvogëlon numrin e punonjësve. Ky ndryshim tregon se “Klarna” ka filluar të adaptohet me teknologjinë dhe të përdorë inteligjencën artificiale në vend të fuqisë punëtore tradicionale.
Përkundër ndalimit të rekrutimit, Siemiatkowski është optimist për të ardhmen e “Klarna” dhe potencialin e tregut të kartave të kreditit, duke e konsideruar atë një mundësi prej triliona dollarësh. Ai theksoi se, megjithëse “Klarna” është një “pjesë e vogël” e këtij tregu, kompania ka ende shumë mundësi për të rritur aktivitetet e saj.
Komentet e Siemiatkowski-së përputhen me ato të Elon Musk, i cili ka paralajmëruar se në të ardhmen AI mund të bëjë të gjitha punët dhe njerëzit mund të punojnë vetëm për kënaqësi personale. Musk ka theksuar se kjo mund të sjellë një “pasiguri ekzistenciale” për individët, por gjithashtu ka sugjeruar se AI mund të ofrojë mundësi të reja, si përmirësimin e arsimit dhe krijimin e miqësive më të thella mes njerëzve dhe makinave.
