Rritja e temperaturave gjatë verës po kthehet në një problem gjithnjë e më serioz për cilësinë e gjumit dhe shëndetin e përgjithshëm, paralajmërojnë ekspertët. Sipas tyre, nxehtësia e tepërt gjatë natës po prish procesin natyral të rikuperimit të trupit, duke çuar në lodhje dhe gjumë të fragmentuar.
Studiuesi Joseph Dzierzewski nga “Fondacioni Kombëtar i Gjumit” shpjegon se për të arritur një gjumë të thellë dhe cilësor, temperatura e trupit duhet të ulet natyrshëm me rreth 1 deri në 2 gradë Celsius.
Çdo ndërprerje e këtij procesi, sipas tij, ndikon drejtpërdrejt në cilësinë e pushimit.
Ekspertët rekomandojnë krijimin e një ambienti sa më të freskët në dhomën e gjumit, duke shmangur akumulimin e nxehtësisë dhe duke përdorur materiale të lehta që lejojnë ajrosje më të mirë. Në disa raste, këshillohet edhe përdorimi i ventilimit ose mënyrave të tjera për ftohjen e ambientit.
Sipas specialistëve, temperatura ideale për gjumë të shëndetshëm duhet të jetë mes 15 dhe 19 gradë Celsius. Po ashtu, lagështia e lartë në ajër mund ta përkeqësojë edhe më shumë situatën, duke e bërë trupin të ketë më vështirësi në ftohje natyrale.
Mjekët paralajmërojnë gjithashtu se ndikimi i temperaturave të larta nuk kufizohet vetëm te gjumi, por mund të ndikojë edhe në shëndetin hormonal dhe riprodhues, përfshirë uljen e prodhimit të spermës.
Ekspertët theksojnë se gjumi cilësor është thelbësor për energjinë, ekuilibrin hormonal dhe mirëqenien e përgjithshme, duke e bërë kontrollin e temperaturës një faktor kyç për shëndetin e përditshëm.
