Vetëm disa orë pas intervistës emocionale të Dukës së Sussex për BBC, ku ai shprehu zhgënjimin e thellë për humbjen në betejën ligjore për sigurinë e tij në Mbretërinë e Bashkuar, Pallati i Buckingham ka reaguar me një deklaratë zyrtare.
Një zëdhënës i pallatit theksoi se:
Të gjitha këto çështje janë shqyrtuar në mënyrë të përsëritur dhe me kujdes nga gjykatat, me të njëjtin përfundim të arritur në secilin rast.
Deklarata e pallatit vjen pasi Princi Harry bëri thirrje për pajtim me Familjen Mbretërore, duke zgjatur, siç e quajti ai, një “dorë miqësie”.
Ai pranoi se është “i shkatërruar” nga vendimi i gjykatës dhe se marrëdhënia me Mbretin Charles është e tensionuar, pasi sipas tij, i ati nuk komunikon më për shkak të çështjes së sigurisë.
Unë nuk dua të luftoj më. Nuk e di sa kohë i ka mbetur babait tim
– tha Princi Harry në intervistë, deklaratë që shkaktoi reagime të forta në opinionin publik britanik dhe më gjerë.
Pavarësisht fjalëve të tij të sinqerta dhe thirrjes për rikthimin e marrëdhënieve familjare, përgjigja e Pallatit sugjeron se çështja ligjore për sigurinë nuk do të rihapet, duke nënvizuar se vendimet janë marrë me kujdes nga autoritetet gjyqësore.
Mbetet për t’u parë nëse kjo situatë do të sjellë ndonjë ndryshim në raportet e ftohta mes Princit Harry dhe Familjes Mbretërore.
