Policia njofton se pas një operacioni të mirëkoordinuar nga shërbimet e Drejtorisë Vendore të Policisë Dibër, në bashkëpunim me njësinë e inteligjencës policore u arrestua 19-vjeçari, i shpallur në kërkim disa ditë më parë. I riu u kap dhe u ndalua si i dyshuar për plagosjen me mjet prerës të një shtetasi, gjatë një konflikti që ndodhi më 13 prill 2025, në lagjen “Dobrovë” të qytetit të Peshkopisë.
Sipas uniformave blu, ngjarja ndodhi për motive të dobëta. Ndërkohë, i plagosuri ndodhet jashtë rrezikut për jetën dhe vijon trajtimin mjekësor në spital. Po në kuadër të hetimeve mbi këtë rast, u proceduan penalisht në gjendje të lirë tre persona të tjerë, të cilët dyshohet se kanë fshehur ngjarjen duke mos e kallëzuar atë pranë autoriteteve.
Njoftimi zyrtar:
Si rezultat i kontrolleve intensive, të kryera nga shërbimet e Drejtorisë Vendore të Policisë Dibër dhe të mbështetura te informacionet e siguruara nga inteligjenca policore, u kap dhe u ndalua shtetasi E.E., 19 vjeç, banues në Peshkopi.
Ai u shpall në kërkim më datë 13.04.2025, pasi dyshohet se gjatë një konflikti për motive të dobëta, në lagjen “Dobrovë”, Peshkopi, ka goditur me mjet prerës, shtetasin E.Sh., 20 vjeç. Dje, u proceduan në gjendje të lirë tre shtetas, për moskallëzim të këtij krimi.
Ndërkaq, i dëmtuari vijon të jetë në kujdesin e mjekëve dhe jashtë rrezikut për jetën. Materialet procedurale iu referuan Prokurorisë së Dibrës, për veprime të mëtejshme, për veprën penale “Plagosja e rëndë me dashje”.
