Një episod që ngjan më shumë me një skenë komedie britanike sesa me realitetin, është zhvilluar në lagjen Fulham të Londrës, ku Princi Harry është parë duke u endur nëpër rrugë, i hutuar dhe në kërkim të një adrese që nuk po e gjente dot.
Sipas mediave britanike, Duka i Sussex-it ka trokitur të paktën tri herë në dyer të gabuara, duke habitur banorët që nuk e besonin kur panë princin vetë përballë tyre. Një nga momentet është kapur edhe nga një kamerë sigurie në derë, ku ai shfaqet i pasigurt dhe i hutuar për vendndodhjen e saktë.
Kjo ngjarje vjen në një periudhë të ngarkuar për princin, i cili është përfshirë në një përballje ligjore me autoritetet britanike për heqjen e sigurimit të armatosur gjatë vizitave të tij në Mbretërinë e Bashkuar. Harry ka shprehur shqetësimin për sigurinë e tij dhe të familjes, duke theksuar se ndihet i pambrojtur pa mbrojtje zyrtare.
Për shumë qytetarë britanikë, megjithatë, pamja e një princi të njohur që endet rrugëve si çdo qytetar tjetër ka sjellë një moment humori “klasik anglez” dhe një kujtim të pazakontë për lagjen Fulham – që me siguri nuk do ta harrojë këtë vizitë mbretërore.
