“Mbyllja e TikTok është vendimi i duhur për sigurinë e fëmijëve, prandaj prindërit nuk iu përgjigjën thirrjes së Partisë Demokratike për protestë kundër këtij vendimi”, u shpreh kryeministri Edi Rama, teksa komentoi tubimin e së shtunës nga e djathta.
“Thirrjes së palës tjetër për të bërë protesta, nuk iu përgjigjën. Sepse kur vjen puna te interesi i drejtpërdrejtë i shëndetit dhe sigurisë së fëmijëve, aty nuk ka të majtë dhe të djathtë, nuk ka më pëlqen apo s’më pëlqen kush e ka këtë mendim, por thotë se ky është vendimi i duhur. E njëjta gjë duhet parasysh në 11 maj”, tha kryesocialisti.
Duke folur për rrugëtimin e vendit tonë drejt unionit, Rama u shpreh se Shqipëria ka bërë hapa më të shpejtë se çdo vend i rajonit.
“Ne nuk mund ta humbasim trenin. Çdo minutë është e rëndësishme. Kini parasysh që Serbia negocion prej vitit 2014, Mali i Zi negocion prej shumë vitesh, Maqedonia e Veriut ka qenë para nesh kandidate, ne negociojmë prej vitit të shkuar. Dhe bashkë me Malin e Zi, jemi në një kontratë me BE, për mbylljen e negociatave brenda vitit 2027. Është koha më e shkurtër dhe këtë e ka sjellë përputhja gjeopolitike e rrethanave tona me rrethanat e tyre. Ata dua që ne të bëhemi anëtarë të BE dhe të bëhemi tani. Në këtë ngut të tyre, është dhe ky sensi i urgjencës i krijuar nga situata gjeopolitike. Për të bërë këtë ama, duhet të bëjmë negocioatat, që janë detyra shumë të ngatërruara dhe shumë voluminoze“.
Nga takimi me ‘skuadrën’ e Partisë Socialiste, kryeministri Edi Rama komentoi primaret e opozitës, ku sipas tij lista e 11 majit u bë në bazë të interesave, jo sipas meritës.
Rama i bëri thirrje edhe mbështetësve të opozitës, për të cilët tha se nuk duhet ‘ta çojnë votën dëm’.
“Populli që mban peng këneta jo vetëm që duhet të shkëputet nga këneta. Ne nuk kemi bërë primare, primare iu thënçin se ato janë si papare jo primare. Por në këtë grup është bërë një vlerësim i atyre njerëzve që vijën nga një kontribut i drejtpërdrejtë në parti. Këtu Avdiu as që e ka pritur që do ishte në listën e deputetëve. Shikoni ça ndodh me ta, ata që fituan i lanë jashtë. Kryetari i Partisë në Kavajë del i pari, e lënë jashtë pa asnjë problem. Në një kuptim po të shikosh listën e kënetës, ajo është listë është bërë për të qenë më një listë qorrash e shurdhësh e kua kua kuash. Është bërë gati për të qenë opozitë. Jo për të çliruar tiktakun por për të thënë fituam por na e morën si gjithmonë.
Pse duhet ata që mund të kenë shumë arsye të mos jenë të kënaqur me ne, ta hedhin votën kot. Për një grup që funksionon si një grup interesi i ngushtë dhe është i përgatitur të rri në opozitë. Ka edhe të tjerë në xhiro se kjo është një periudhë shitje qilimash fluturues. Kush ta hajë ta hajë, kur s’ke gjë në dorë mund t’i premtosh të gjitha. Këta më kujtojnë një vizitë në një vaki me Fatos Nanon kur ishte kryeministër. Njëri po i thoshte që me pronat nuk po qullosen gjë, ke ndonjë ide ti i tha. Merrjani katunarëve tha dhe ndajeni këtë punë.
I tha Fatosi kjo është ide e fuqishme por këtë duhet ta ndash me Sabriun. Këta që s’kanë në dorë i premtojnë të gjitha. Nëse ka një vend që i duhet BE është Shqipëria. Për arsye historike dhe që lidhen me shkëputjen njëherë e mirë nga kthetrat e historisë dhe me lidhjen e të ardhmes në funksion të lirisë”-u shpreh Rama.
