Shefi ekzekutiv i OpenAI, Sam Altman, ka paralajmëruar për rreziqet që lidhen me përdorimin e tepërt të ChatGPT, veçanërisht nga të rinjtë që e përdorin për këshilla personale apo emocionale. Ai theksoi se bisedat me këtë Inteligjencë Artificiale nuk janë të mbrojtura ligjërisht, siç ndodh me marrëdhëniet mes pacientit dhe terapistit, apo klientit dhe avokatit. Sipas tij, kjo do të thotë se informacionet e ndara në ChatGPT mund të përdoren si prova në gjykatë.
Altman theksoi se shumë njerëz i tregojnë AI-së detaje shumë personale nga jeta e tyre, gjë që mund të sjellë pasoja serioze në raste ligjore. Ai shtoi se duhet të ekzistojë një nivel i ngjashëm privatësie me atë që kemi me profesionistët e shëndetit mendor. Në një tjetër deklaratë, Altman shprehu shqetësim për varësinë e tepërt ndaj ChatGPT për marrjen e vendimeve personale. Sipas tij, është shqetësuese që të rinjtë e konsiderojnë AI-në si “zëri i fundit” për çdo çështje të jetës. Ai theksoi se OpenAI po punon për të gjetur mënyra për ta adresuar këtë problem në rritje.
Drejtori ekzekutiv dhe bashkëthemeluesi i OpenAI, tha së fundmi se teknologjia e re e Inteligjencës Artificiale do të ketë një ndikim pozitiv tek djali i tij i mitur dhe fëmijët e mundshëm në të ardhmen. Altman, i cili njoftoi lindjen e fëmijës së tij të parë më 22 shkurt, tha se fëmijët e tij do të rriten për të qenë më të aftë për shkak të mjeteve si ChatGPT. Por “fëmijët e mi nuk do të jenë kurrë më të zgjuar se AI-ja”-tha Altman në episodin e parë të Podcastit OpenAI.
