Sot në orën 16:30, mijëra studentë protestojnë para Urës së Gurit në Shkup për kryerjen e provimit të drejtësisë në gjuhën shqipe.
“Bashkohuni me studentët – të gjithë njëzëri”, është slogani i protestës që si mesazh ka mbrojtjen e së drejtës së gjuhës për provimet profesionale.
Dje pati dhjetëra reagime në mbështetje të studentëve nga figurat publike si Ramush Haradinaj, Shkurte Fejza, ambasadori i Shqipërisë në Shkup e PDK-ja.
Kjo është protesta e dytë që organizojnë studentët shqiptarë dhe vjen si pasojë e refuzimit të kërkesës së tyre nga ana e ministrit të Drejtësisë.
Më 6 prill 2026 në Shkup, mijëra studentë dhe qytetarë shqiptarë dolën në zemër të Shkupit dhe kërkuan respektimin e të drejtës së tyre, çka nxiti kryeministrin Hristijan Mickoski të deklaronte se qeveria e tij po punonte për një zgjidhje dhe shumë shpejt do të kishte një propozim konkret.
Çfarë thotë ligji për provimin e jurisprudencës?
Sipas mediave në Maqedoninë e Veriut, në Ligjin për Provimin e Jurisprudencës nuk ekziston dispozitë ligjore në të cilin thuhet se ky provim mund të mbahet vetëm në gjuhë maqedonase. Neni 2 i Ligjit për Përdorimin e Gjuhëve thotë:
Institucionet e qeverisjes shtetërore duhet të mundësojnë përdorim të gjuhëve tjera zyrtare të cilat fliten nga më së paku 20% e qytetarëve, që është gjuha shqipe.
Projekt propozimi që do të mundësonte dhënien e provimit të jurisprudencës në gjuhën shqipe ka qenë gati në vitin 2024 nga Ministria e Drejtësisë, por me ndryshimin e përbërjes parlamentare dhe qeverisë së re, u hoq nga agjenda e parlamentit dhe nuk u përmend më nga qeveria aktuale.
Ligji për Zbatimin e Gjuhëve hyri në fuqi në vitin 2019 dhe prej asaj kohe, në Maqedoninë e Veriut janë ndërruar ministra të Drejtësisë si Bojan Mariçiç, Nikolla Tupançevski e Krenar Lloga. Aktualisht, ministër është Igor Filkov.
Neni 2 dhe neni 5 i këtij ligji thonë:
Institucionet janë të detyruara të mundësojnë përdorim të gjuhës shqipe në të gjitha procedurat para gjykatave dhe organeve tjera shtetërore.
Kjo do të thotë se në qoftë se ligji për provimin e jurisprudencës nuk e kufizon dhënien e këtij provimi vetëm në gjuhën maqedonase, duhet të mundësohet edhe në gjuhën shqipe.
