Një hulumtim i ri i publikuar në revistën mjekësore “PLOS One” ka treguar se përdorimi i telefonit në tualet lidhet drejtpërdrejt me një rrezik më të lartë për zhvillimin e hemorroideve.
Studimi, që përfshiu 125 të rritur të cilët iu nënshtruan kolonoskopisë, zbuloi se ata që përdorin telefonin në banjo kanë 46% më shumë gjasa të preken nga hemorroidet, krahasuar me personat që nuk e kanë këtë zakon.
Sipas të dhënave, 66% e pjesëmarrësve pranuan se shfrytëzojnë kohën në tualet për të lexuar lajme ose për të shfletuar rrjetet sociale, duke qëndruar shpesh më shumë se 5 minuta të ulur.
Mjekët paralajmërojnë se kjo sjellje shton presionin në venat rektale dhe pengon qarkullimin e gjakut, duke shkaktuar fryrje, dhimbje, kruarje apo edhe gjakderdhje – simptomat tipike të hemorroideve.
Ekspertët theksojnë se qëndrimi i gjatë në tualet është më i dëmshëm se ulja në karrige, pasi mungesa e mbështetjes së duhur për legenin e përkeqëson presionin në zonën anale.
Këshilla e mjekëve: Mos qëndroni më shumë se 3 deri në 5 minuta në tualet dhe shmangni përdorimin e telefonit gjatë këtij momenti, për të mbrojtur shëndetin tuaj.
