Rrallëkush flet hapur për to, por hemorroidet janë ndër problemet më të shpeshta shëndetësore në botë. Statistikat tregojnë se më shumë se gjysma e të rriturve i përjetojnë të paktën një herë në jetë.
Dhimbje, kruarje, gjakderdhje dhe parehati janë simptomat që i shoqërojnë, por pyetja kryesore që i mundon të gjithë është: sa zgjasin hemorroidet dhe kur kalojnë?
Përgjigjja nuk është e njëjtë për të gjithë. Kohëzgjatja varet nga lloji, faza dhe mënyra e jetesës. Në disa raste simptomat zhduken brenda disa ditësh, ndërsa në të tjera mund të zgjasin me javë apo të rikthehen herë pas here.
Çfarë janë hemorroidet në të vërtetë?
Hemorroidet, të njohura si majasëll, janë zgjerime të venave në pjesën e poshtme të rektumit dhe rreth anusit. Ato janë pjesë normale e trupit, por bëhen problem kur inflamohen ose fryhen.
Mjekët i krahasojnë me një “sistem tubash”: kur presioni rritet, venat zmadhohen dhe fillojnë shqetësimet.
Llojet kryesore
-Hemorroide të brendshme – ndodhen brenda rektumit, shpesh pa dhimbje, por mund të shkaktojnë gjakderdhje.
-Hemorroide të jashtme – shfaqen rreth anusit dhe shkaktojnë dhimbje, kruarje dhe enjtje.
-Hemorroide të trombozuara – kur krijohet mpiksje gjaku, duke sjellë dhimbje të forta.
Pse shfaqen?
Shkaku kryesor është presioni i shtuar në zonën e legenit. Faktorët më të zakonshëm janë:
-kapsllëku dhe sforcimi në tualet
-shtatzënia dhe lindja
-qëndrimi ulur për kohë të gjatë
-mungesa e aktivitetit fizik
-ushqimi me pak fibra
-obeziteti
-predispozita gjenetike
-mosha mbi 50 vjeç
Simptomat kryesore
-gjak i kuq i çelët gjatë jashtëqitjes
-kruarje dhe djegie
-dhimbje gjatë uljes
-ndjesi e zbrazjes jo të plotë
-fryrje ose “kokrra” rreth anusit
Sa zgjasin?
Kohëzgjatja ndryshon sipas rastit:
-Forma të lehta: disa ditë deri në 1 javë
-Hemorroide të jashtme të trombozuara: 1–3 javë
-Forma kronike: mund të zgjasin më gjatë dhe kërkojnë trajtim mjekësor
Edhe pasi zhduken, ato mund të rikthehen nëse nuk ndryshohen zakonet.
Trajtimi
Shpesh fillon me ndryshime në stilin e jetesës:
-konsum më i lartë i fibrave
-shumë ujë gjatë ditës
-aktivitet fizik i rregullt
-banja të ngrohta për lehtësim
-kremra dhe supozitorë qetësues
Në rastet më të rënda përdoren procedura mjekësore si ligatura, skleroterapia ose ndërhyrja kirurgjikale.
Hemorroidet nuk janë një problem për t’u injoruar, por as për t’u fshehur. Trajtimi në kohë dhe ndryshimi i zakoneve janë çelësi për t’i mbajtur nën kontroll dhe për të shmangur rikthimin e tyre.
