The Weeknd ka njoftuar rikthimin e tij në Evropë me një seri prej 12 koncertesh madhështore në verën e vitit 2026, si pjesë e turneut botëror “After Hours Til Dawn”.
Turneu do të nisë më 7 korrik në Paris dhe do të përfundojë në fund të gushtit në Madrid, duke përfshirë ndalesa në qytete kryesore si Amsterdam, Nicë, Milano, Frankfurt, Varshavë, Stokholm, Londër dhe Dublin.
Një nga momentet kulmore të turit do të jetë dyshja e koncerteve në stadiumin legjendar Wembley, më 14 dhe 15 gusht, ku pritet një publik prej dhjetëra mijëra fansash.
The Weeknd do të ketë në krah reperin Playboi Carti, i cili do të hapë koncertet në Evropë dhe Mbretërinë e Bashkuar.
Përpara pjesës europiane, artisti kanadez do të performojë në Amerikën Latine gjatë prillit dhe majit 2026, me ndalesa në vende si Meksika dhe Brazili, ku do të shoqërohet nga këngëtarja Anitta.
Abel Makkonen Tesfaye, i njohur botërisht si The Weeknd, është një nga figurat më të rëndësishme të muzikës pop dhe R\&B. Me zërin e tij unik dhe stilin e veçantë, ai ka fituar katër çmime Grammy, 20 çmime Billboard Music, 22 Juno Awards, gjashtë American Music Awards, tre MTV Video Music Awards dhe një Latin Grammy.
Turneu “After Hours Til Dawn” pritet të jetë një nga ngjarjet më të mëdha muzikore të vitit 2026, duke përforcuar statusin e The Weeknd si një ikonë botërore të skenës muzikore.
