Donald Trump tha se një marrëveshje me Iranin për t’i dhënë fund luftës “është negociuar gjerësisht” dhe se “aspektet finale e detajet” po diskutohen. Por, Teherani menjëherë hodhi poshtë disa nga pretendimet e presidentit të Shteteve të Bashkuara.
Një marrëveshje është negociuar gjerësisht, subjekt i finalizimit mes SHBA-ve, Republikës Islamike të Iranit dhe disa shteteve të tjera, shkroi Trump në Truth Social.
Aktualisht po diskutohen aspektet dhe detajet përfundimtare të marrëveshjes dhe ato do të bëhen publike së shpejti. Përveç shumë elementeve të tjera të marrëveshjes, Ngushtica e Hormuzit do të hapet.
Teherani nuk komentoi zyrtarisht mbi deklaratat e Trump-it, por Ebrahim Zolfaghari, zëdhënës i komandës ushtarake të Iranit, tha se pretendimi i presidentit amerikan se Ngushtica e Hormuzit do të hapet, nuk është “i vërtetë”.
Hormuzi do të mbetet plotësisht nën kontrollin iranian. Ne vendosim kush kalon, kur dhe si, shkroi në X.
Agjencia iraniane e lajmeve Fars, e afërt me Korpusin e Gardës Revolucionare Islamike (IRGC), theksoi edhe se ngushtica do të mbetet nën administrimin e Teheranit e se njoftimi për rihapjen e saj si pjesë e marrëveshjes ishte “i paplotë dhe nuk përputhet me realitetin”.
The New York Times, duke cituar zyrtarë amerikanë të paidentifikuar, raportoi se Irani kishte pranuar që të heqë dorë nga rezervat e tij të uraniumit të pasuruar si pjesë e propozimit më të fundit, që është një kërkesë kyç e SHBA-ve.
