Influencerja e njohur italiane Chiara Ferragni duket se ka gjetur sërish dashurinë. Pas ndarjes nga Giovanni Tronchetti Provera, ajo është fotografuar nga paparacët në Milano në shoqërinë e një mashkulli që po përflitet si partneri i saj më i ri. Sipas mediave italiane ai është menaxheri kolumbian Jose Hernandez. Të dy u fotografuan gjatë një shëtitjeje me qenin e saj Paloma, ndërsa në një moment janë kapur edhe duke u puthur, gjë që ka nxitur zërat për një lidhje romantike.
Lajmi u publikua nga revista italiane “Chi”, e cila ndau edhe kopertinën ku Ferragni shfaqet përkrah partnerit të saj të ri. Sipas raportimeve, dyshja janë njohur gjatë pushimeve të Krishtlindjes në Amerikën e Jugut, ku influencuesja kishte udhëtuar së bashku me motrën e saj Valentina Ferragni dhe disa miq. Takimi mes tyre thuhet se ka ndodhur në Cartagena, dhe pikërisht aty ka nisur afrimi që më pas është kthyer në një lidhje.
Ndërkohë, ish-bashkëshorti i saj Fedez nuk ka reaguar ndaj lajmeve që qarkullojnë për jetën e tij private, përfshirë edhe thashethemet që flasin për një shtatzëni të mundshme të partneres së tij aktuale, Giulia Honegger. Reperi është aktualisht i fokusuar te suksesi muzikor, pasi kënga “Male necessario”, e prezantuar në Festivalin e Sanremos në duet me Marco Masini, ka marrë shumë vëmendje.
Sa i përket José Hernandez, informacionet për të janë ende të kufizuara. Ai punon për një kompani shumëkombëshe që merret me prodhimin e gomave dhe jeton në Itali, ku edhe ka kryer studimet. Revista “Chi” ka publikuar disa foto të çiftit gjatë një shëtitjeje në Milano, të shoqëruar edhe nga qeni i Ferragni-t, Paloma. Sipas raportimeve, Hernandez është parë gjithashtu edhe gjatë një takimi me nënën e sipërmarrëses, Marina Di Guardo. Pas përfundimit të martesës me Fedez, me të cilin ka dy fëmijë, Chiara Ferragni pati një lidhje me sipërmarrësin Giovanni Tronchetti Provera, por kjo marrëdhënie përfundoi në muajt e fundit të vitit 2025.
