Phoebe Gates, vajza 23-vjeçare e Bill Gates, po ndërton një emër të fortë në industrinë e teknologjisë, duke siguruar 30 milionë dollarë investime për startup-in e saj të inteligjencës artificiale, Phia.
Kompania, e themeluar së bashku me shoqen e saj nga Stanford, Sophia Kiani, vlerësohet tashmë në rreth 180 milionë dollarë, vetëm pak muaj pas një raundi fillestar prej 8 milionë dollarësh.
Phia zhvillon një motor kërkimi me AI që synon të thjeshtojë blerjet online, duke lejuar përdoruesit të krahasojnë çmime dhe të ndjekin ofertat në kohë reale. Platforma është shkarkuar rreth 750 mijë herë në tetë muajt e parë.
Startup-i ka tërhequr investitorë të njohur si Hailey Bieber, Kris Jenner dhe Sheryl Sandberg, ndërsa raundi i ri i financimit udhëhiqet nga Notable Capital. Phoebe Gates ka theksuar se babai i saj nuk ka investuar në kompani, por e mbështet misionin e saj.
E diplomuar në Stanford në vitin 2024, ajo po dëshmon se suksesi i saj shkon përtej emrit të famshëm të familjes.
