Princ William ka bërë një lëvizje që ka tërhequr vëmendjen e mediave britanike, mes raportimeve të vazhdueshme për tensionet me vëllain e tij, Princ Harry.
Monarku i ardhshëm britanik u shfaq së fundmi në Birmingham, ku kaloi kohë me Harry Wentworth, bashkëshortin e ish-të dashurës së Princit Harry, Cressida Bonas, gjatë një aktiviteti në mbështetje të shëndetit mendor të burrave.
James’ Place, organizata që William vizitoi, u themelua nga Clare Milford Haven dhe Nick Wentworth-Stanley në kujtim të djalit të tyre, James Wentworth-Stanley, i cili humbi jetën tragjikisht nga vetëvrasja në vitin 2006.
Harry Wentworth, i cili u martua me Cressida Bonas në vitin 2020, publikoi në Instagram disa fotografi nga vizita e princit dhe shprehu mirënjohjen për mbështetjen e tij.
Ishte një nder i madh të mirëprisja Lartësinë e Tij Mbretërore, Princin e Uellsit, në James’ Place Birmingham të hënën, për të hapur zyrtarisht qendrën për referime
-shkroi ai.
Ai zbuloi gjithashtu se qendra synon të mbështesë rreth 500 burra në krizë vetëvrasëse çdo vit në Midlands Perëndimore.
Në postimin e tij, Harry Wentworth tregoi se do të ndërmarrë edhe një sfidë sportive për bamirësi, “Journey For James”, një triatlon prej mbi 400 miljesh mes qendrave të James’ Place.
Gjatë vizitës, Princi William foli hapur për rëndësinë e mbështetjes së shëndetit mendor dhe nevojën për më shumë qendra të tilla në United Kingdom.
Ekipi këtu është fantastik. Shpresoj se mund të sjellim më shumë prej jush në të gjithë Mbretërinë e Bashkuar, sepse për fat të keq ka nevojë për ju
-u shpreh ai.
William shtoi se duhet të ketë më shumë diskutim rreth vetëvrasjes dhe parandalimit të saj, duke theksuar rëndësinë e ndihmës së hershme për të rinjtë.
Duhet të flasim më shumë për vetëvrasjen, të flasim më shumë për parandalimin e saj dhe të flasim për t’u ofruar ndihmë të rinjve dhe të rejave më herët
-deklaroi Princi i Uellsit.
Gjatë vizitës në qendrën e re në Birmingham, ai takoi stafin, partnerët dhe personat që kanë përfituar nga shërbimet e organizatës bamirëse.
