Abuzimi emocional nuk lë mavijosje në trup, por lë plagë të thella në mendje dhe shpirt. Shpesh i padukshëm për të tjerët, ai mund të ndodhë çdo ditë, në marrëdhënie dashurie, familjare apo edhe profesionale. Psikologët paralajmërojnë se njohja e shenjave të para është çelësi për të mbrojtur veten.
Sipas ekspertëve të shëndetit mendor, këto janë disa nga sinjalet më të zakonshme të një abuzuesi emocional:
Kontrolli i fshehtë
Në fillim mund të duket si kujdes ose dashuri, por kur dikush kërkon të dijë çdo hap tuajin, vendimet që merrni apo me kë flisni – ky është kontroll, jo dashuri.
Ulja e vetëvlerësimit
Abuzuesit përdorin komente sarkastike, kritikë të vazhdueshme apo krahasime me të tjerët për t’ju bërë të ndiheni të pavlefshëm. Kjo është mënyra e tyre për të ruajtur kontrollin.
Izolimi i qëllimshëm
Nëse partneri apo dikush tjetër ju largon nga familja, miqtë apo aktivitetet që doni, kjo është një taktikë klasike e abuzimit emocional për t’ju bërë të ndiheni të varur.
Manipulimi përmes fajit
Shprehje si “Po të më doje, do ta bëje këtë për mua” ose “Ti gjithmonë më zhgënjen” janë forma manipulimi që ndikojnë ndjeshëm në psikikën e viktimës.
Nënçmimi i ndjenjave tuaja
Nëse ndiheni të lënduar dhe personi përballë jush ju thotë “Je shumë i ndjeshëm” apo “Po e ekzagjeron”, ai/ajo po përpiqet të mohojë realitetin tuaj emocional.
Frikësimi i heshtur
Abuzuesit emocionalë nuk bërtasin gjithmonë. Shpesh ata përdorin heshtjen si ndëshkim, shikime kërcënuese apo ndjesinë që ecni mbi “vezë” kur jeni pranë tyre.
Ndjesia e vazhdueshme se po bëni diçka gabim
Nëse ndiheni sikur gjithmonë duhet të kërkoni falje, edhe kur nuk jeni fajtor, kjo është shenjë se dikush po manipulon perceptimin tuaj të realitetit.
Psikologët këshillojnë që të mos injoroni ndjesitë tuaja. Bisedoni me një mik të besuar ose kërkoni ndihmë profesionale. Abuzimi emocional është real dhe shpesh është pararendës i formave të tjera më të rënda të abuzimit.
Mos harroni: Dashuria e vërtetë nuk lëndon. Ajo mbështet, respekton dhe fuqizon!
