Nëse doni të përmirësoni seriozisht shëndetin e zorrëve, përgjigjja mund të jetë më e thjeshtë nga sa mendoni: mjedrat. Të ëmbla, të shijshme dhe të pasura me lëndë ushqyese, ato konsiderohen nga ekspertët si një “super-ushqim” për tretjen.
Statistikat janë alarmante: mbi 90% e grave dhe 97% e burrave nuk konsumojnë sasinë e rekomanduar të fibrave çdo ditë.
Ndërkohë, fibra është thelbësore për tretjen e rregullt, shëndetin e mikrobiomës së zorrëve, kontrollin e peshës, uljen e inflamacionit dhe madje për rritjen e jetëgjatësisë.
Sipas gastroenterologut Will Bulsiewicz, mjedrat janë ndër zgjedhjet më të mira për shëndetin e traktit tretës. Një filxhan përmban rreth 7 gramë fibra, pothuajse gjysma e asaj që konsumon mesatarisht një person në ditë.
Por përfitimet nuk ndalen këtu. Mjedrat janë gjithashtu të pasura me:
– Vitaminë C
– Polifenole (antioksidantë me efekt anti-inflamator)
– Nivel të ulët FODMAP, çka i bën të përshtatshme edhe për personat me sindromën e zorrës së irritueshme (IBS)
Po diabeti?
Edhe pse përmbajnë sheqerna natyralë, studimet sugjerojnë se mjedrat mund të ndihmojnë në uljen e rrezikut për diabet të tipit 2. Madje, disa kërkime tregojnë se ato mund të kontribuojnë në përmirësimin e kontrollit të sheqerit në gjak te personat që tashmë vuajnë nga kjo sëmundje.
Si t’i përfshini në dietë?
Ekspertët sugjerojnë mënyra të thjeshta dhe të shijshme:
– Shtojini në smoothie
– Kombinojini me bukë të thekur dhe gjalpë kikiriku
– Përdorini në sallata frutash
Nëse doni një sistem tretës më të fortë dhe një organizëm më të shëndetshëm, ndoshta është koha t’i bëni mjedrat pjesë të përditshmërisë suaj. Ndonjëherë, ndryshimi i madh nis nga një frut i vogël.
