Shefja e politikës së jashtme të Bashkimit Evropian, Kaja Kallas, tha sot se nuk ishte e mundur të imagjinohej kthimi i aseteve ruse të ngrira brenda bllokut për shkak të luftës në Ukrainë, nëse Moska nuk ka paguar dëmshpërblimet, sipas Reuters.
Nuk mund ta imagjinojmë që… nëse… ka një armëpushim ose një marrëveshje paqeje që këto asete t’i kthehen Rusisë nëse ajo nuk i ka paguar dëmshpërblimet, u tha ajo gazetarëve para një takimi të ministrave të jashtëm të BE-së në Kopenhagen.
BE-ja thotë se rreth 210 miliardë euro (245.85 miliardë dollarë) asete ruse janë të ngrira në bllok sipas sanksioneve të vendosura ndaj Moskës për pushtimin e Ukrainës.
Ukraina dhe disa vende të BE-së, përfshirë Poloninë dhe shtetet baltike, kanë bërë thirrje që BE-ja të konfiskojë asetet dhe t’i përdorë ato për të mbështetur Kievin.
Por fuqitë e mëdha të BE-së, Franca dhe Gjermania, së bashku me Belgjikën, e cila mban shumicën e aseteve, i kanë kundërshtuar thirrje të tilla.
Ata kanë theksuar se BE-ja ka caktuar fitime të ardhshme nga asetet për të shlyer mbështetjen për Ukrainën dhe kanë vënë në dyshim nëse ekziston një bazë ligjore për t’i konfiskuar ato.
Diplomatët thonë se debati tani po kthehet në mënyrën se si mund të përdoren fondet, pasi të ndalet lufta në Ukrainë.
Presidenti ukrainas, Volodymyr Zelensky u ka bërë thirrje Shteteve të Bashkuara të Amerikës, Evropës dhe “të gjithë botës” të ndërmarrin veprime më vendimtare kundër Rusisë për pushtimin e vazhdueshëm të vendit të tij.
Kjo luftë nuk do të ndalet me deklarata politike. Nevojiten hapa të vërtetë, shkroi Zelensky sot në Facebook pas sulmeve të fundit gjatë natës.
Në mënyrë specifike, Zelensky bëri thirrje për vendosjen e tarifave të ashpra ndaj vendeve që blejnë naftë dhe gaz nga Rusia dhe në këtë mënyrë financojnë operacionet ushtarake të Moskës.
Presidenti ukrainas, me sa duket, iu referohej vendeve si Kina dhe India, të cilat nuk i përmendi.
Ai theksoi se nevojiteshin sanksione të mëtejshme për të synuar vetë Rusinë në sektorët bankarë dhe të energjisë.
Zelensky u ankua për faktin se Rusia kishte treguar përmes sulmeve të saj të fundit me raketa, dronë dhe raketa lundrimi se “tregon edhe një herë shpërfilljen e saj të plotë për fjalët”.
Ne mbështetemi në veprime të vërteta, tha Zelensky, duke shtuar se ishte shumë e qartë se Moska kishte përdorur kohën e dhënë nga Perëndimi për të përgatitur bisedime midis presidentëve ukrainas dhe rus për të organizuar sulme të reja.
