Pirja e kafesë menjëherë pas mëngjesit është një zakon i përditshëm për shumë njerëz, por specialistët e ushqyerjes thonë se kjo rutinë mund të ketë një efekt të padukshëm në organizëm: uljen e përthithjes së hekurit.
Sipas studimeve, si kafeja ashtu edhe çaji i zi përmbajnë tanine, përbërës natyralë që lidhen me hekurin gjatë tretjes dhe e bëjnë më të vështirë përthithjen e tij nga trupi.
Ky ndikim është veçanërisht i fortë te hekuri jo-hemik, i cili gjendet në ushqime me bazë bimore si fasule, drithërat dhe perimet jeshile.
Të dhënat tregojnë se konsumimi i kafesë pranë vakteve mund të ulë ndjeshëm sasinë e hekurit që organizmi arrin të përdorë, pasi një pjesë e tij eliminohet pa u përthithur.
Ekspertët theksojnë se kjo bëhet më problematike për personat që kanë mungesë hekuri, pasi niveli në gjak mund të mos arrijë vlerat e nevojshme për funksionim optimal të trupit.
Një tjetër faktor që ndikon në këtë proces është edhe kalciumi, i pranishëm në ushqime si qumësht dhe produktet e tij, i cili mund të konkurrojë me hekurin gjatë përthithjes në zorrë.
Për këtë arsye, specialistët rekomandojnë që kafeja, çaji dhe ushqimet e pasura me kalcium të konsumohen të paktën 1–2 orë larg vakteve kryesore, për të ndihmuar organizmin të përthithë më mirë hekurin dhe të ruajë ekuilibrin ushqimor.
