Kim Kardashian dhe Lewis Hamilton duket se po e çojnë marrëdhënien e tyre në një tjetër nivel.
Ylli 45-vjeçar i reality show-t dhe piloti 41-vjeçar i Formula 1 janë parë së bashku gjatë fundjavës, mbrëmjen e së shtunës (28 shkurt), pranë Lake Powell, rezervuari spektakolar në lumin Colorado, në kufirin mes Utah dhe Arizona.
Sipas mediave amerikane, dyshja është fotografuar duke shijuar perëndimin e diellit në mes të shkretëtirës, ku madje kanë realizuar edhe një selfie së bashku.
Ata janë parë në një zonë të izoluar të rajonit dhe më pas janë kapur nga kamerat duke u kthyer drejt makinës së tyre.
Raportohet se Kim dhe Lewis po qëndronin pranë një resorti luksoz me pesë yje, i njohur për privatësinë maksimale dhe i frekuentuar shpesh nga figura të njohura ndërkombëtare, një zgjedhje perfekte për një arratisje larg vëmendjes mediatike.
Burime pranë çiftit bëjnë të ditur se udhëtimi ka qenë i planifikuar për të kaluar kohë cilësore së bashku, larg zhurmës së zakonshme.
Megjithatë, publikimi i pamjeve ka mjaftuar për të ndezur spekulimet se lidhja e tyre është bërë tashmë më serioze.
Romanca e tyre u konfirmua për herë të parë publikisht gjatë paraqitjes së përbashkët në Super Bowl 2026, ku u shfaqën krah njëri-tjetrit dhe tërhoqën menjëherë vëmendjen e kamerave.
Deri tani, asnjëri prej tyre nuk ka bërë një deklaratë zyrtare për raportin, por fotot e fundit flasin më shumë se fjalët.
