Përplasja ligjore mes Kris Jenner dhe Ray J ka hyrë në një fazë edhe më të ashpër, pasi nëna e Kim Kardashian ka dorëzuar një deklaratë të re në gjykatë, duke e akuzuar këngëtarin për “terrorizim publik” ndaj vajzës së saj për gati dy dekada.
Në dokumentet e paraqitura, Jenner shprehet se Ray J ka manipuluar vazhdimisht narrativën në media vetëm për të qëndruar në qendër të vëmendjes, duke e cilësuar sjelljen e tij si të dëmshme dhe të qëllimshme.
Situata u përshkallëzua pas një transmetimi të drejtpërdrejtë në shtator 2025, ku Ray J pretendoi se agjentë federalë po hetonin Kris dhe Kim për veprime që, sipas tij, ishin edhe më serioze se ato që lidhen me Sean Combs, i njohur si Diddy.
Jenner i quajti këto pretendime “të shëmtuara” dhe theksoi se ato i kanë shkaktuar familjes së saj dhimbje të konsiderueshme.
Në deklaratën e saj emocionale, ajo u shpreh se është thellësisht e lënduar duke parë vajzën e saj të përjetojë stres dhe ndjenjë pashprese nga sulmet e vazhdueshme publike.
Sipas saj, kjo është hera e parë në karrierën e gjatë që ndjen nevojën të ndjekë ligjërisht dikë për shpifje, por këtë herë e konsideron të domosdoshme.
Edhe Kim Kardashian ka reaguar në një dosje të veçantë, duke theksuar se pretendimet e Ray J mund të rrezikojnë aspiratat e saj për t’u bërë avokate. Ajo foli gjithashtu për bisedat e vështira që i është dashur të zhvillojë me katër fëmijët e saj North, Saint, Chicago dhe Psalm, lidhur me akuzat e përsëritura.
Beteja ligjore po bëhet gjithnjë e më komplekse. Në tetor 2025, Kim dhe Kris paditën Ray J për komentet e tij, ndërsa një muaj më vonë ai reagoi me kundërpadi, duke pretenduar se ishin vetë Kardashianët që publikuan kasetën famëkeqe të fillimit të viteve 2000, një akuzë që familja e ka hedhur poshtë si një përpjekje të vazhdueshme për shpërqendrim.
