19 vjet martesë, dy vajza, një nga marrëdhëniet më të qëndrueshme të Hollivudit. Por, Nicole Kidman dhe Keith Urban zgjodhën lamtumirën. Një ndarje që vjen ndërsa të dy po i afrohen të 60-ave, duke risjellë në fokus fenomenin gjithnjë e më të përhapur: “divorcin gri”.
“Divorci gri”, vendimi për t’u ndarë, shpesh pas dekadash bashkëjetese
Ndërsa deri pak vite më parë dukej pothuajse e paimagjinueshme të mbaroje një martesë të gjatë pas daljes në pension, sot gjithnjë e më shumë çifte po zgjedhin të ecin përpara pas të gjashtëdhjetave, duke kërkuar një shans të dytë, një fillim të ri ose thjesht të drejtën për të mos qëndruar aty ku nuk janë më të lumtur.
Dhe shpesh janë gratë ato që bëjnë hapin e parë, tani më të vetëdijshme, të pavarura e më pak të gatshme të sakrifikojnë mirëqenien e tyre për një bashkim që nuk funksionon më.
Nuk është kurrë vonë për të rishkruar jetën tënde. Historitë e ndarjeve të famshme bëjnë lajm, por ato janë vetëm maja e një ajsbergu që prek edhe kaq shumë njerëz të zakonshëm.
Brezi i Baby Boomers dhe epoka e shanseve të dyta
Protagonistët e “divorcit gri” janë brezat e baby boomers, gra dhe burra midis 60 e 70 vjeç, të cilët u rritën në një epokë ndryshimesh të thella shoqërore: nga emancipimi i grave deri te liberalizimi i divorcit. Ky brez nuk ka frikë të fillojë nga e para, të sfidojë veten dhe të ndjekë lumturi të reja.
Por kini kujdes: ndarja pas kaq shumë vitesh nuk është gjithmonë pa dhimbje.
Gratë kanë tendencë të paguajnë një çmim financiar (karriera të ndërprera e pensione më të ulëta). Burrat, nga ana tjetër, shpesh humbasin spirancën e tyre shoqërore dhe familjare.
Hulumtimet e konfirmojnë këtë: pas divorcit, ata kanë më shumë gjasa të përjetojnë vetmi dhe depresion.
Fëmijët e rritur dhe tronditja e një lamtumire të vonë
Ekziston një aspekt tjetër që rrallë diskutohet: efekti i “divorcit gri” te fëmijët e rritur. Ndikimi i ndarjes tek fëmijët është studiuar për vite me radhë. Por, kur prindërit mbi 60 vjeç ndahen, pasojat mund të jenë po aq tronditëse.
Shumë fëmijë e përshkruajnë përjetimin e ndarjes si një “tërmet emocional”, i aftë të trondisë siguritë mbi të cilat kanë ndërtuar identitetin e tyre. Ata ndihen të humbur, të detyruar të marrin një qëndrim, për të mbështetur prindin më të brishtë.
Ndonjëherë e gjejnë veten të kapur në dinamika që nuk duhet t’i shqetësojnë më. Për më tepër, vajzat shpesh përfundojnë duke u bërë shoqe të besueshme dhe mbështetje emocionale, duke zbehur vijat ndarëse midis brezave.
Pas divorcit, lidhjet familjare riorganizohen
Një studim gjerman i kohëve të fundit nxori në pah një fenomen të qartë: fëmijët e rritur kanë tendencë të forcojnë marrëdhëniet me nënën e të distancohen nga babai. Kjo ndodh sepse në familjet tradicionale, shpesh janë gratë ato që menaxhojnë marrëdhëniet: me fëmijët, të afërmit dhe miqtë. Kur çifti ndahet, shumë burra e gjejnë veten vetëm, pa “drejtimin emocional” që i mbante të lidhur me botën.
Divorci mund të jetë i dobishëm. Jo të gjitha “divorcet gri” përjetohen si tragjedi
Në shumë familje, ndarja shihet si një çlirim, veçanërisht kur klima në shtëpi ishte e tensionuar ose konfliktuale. Me kalimin e kohës, edhe plagët familjare mund të shërohen: nuk është e pazakontë që baballarët dhe bijtë të përmirësojnë marrëdhëniet, pas një periudhe fillestare distance. Divorci në moshën 60 vjeç nuk është një dështim. Në shumë raste, është një akt guximi e lirie.
