Blake Lively ka ngritur akuza të rënda ndaj aktorit dhe regjisorit Justin Baldoni, duke pretenduar se ai e ka ushtruar presion që të shfaqej lakuriq gjatë xhirimeve të filmit It Ends With Us, konkretisht në skenën ku personazhi i saj lind vajzën.
Sipas aktores, situata në sheshxhirim ishte “dhunuese dhe poshtëruese”, pasi ajo u detyrua të qëndronte për orë të tëra me “organet gjenitale mezi të mbuluara”, në prani të stafit që ajo e përshkruan si jo-thelbësor për xhirimet.
Pjesë nga dëshmia e Lively-t në betejën e saj ligjore me Baldonin u zbuluan të martën, më 20 janar, dhe përfshijnë detaje shqetësuese mbi mënyrën se si u realizua skena e lindjes.
Ajo pohon se Baldoni dhe producenti i filmit, Jamie Heath, këmbëngulën që ajo të performonte nudo, pavarësisht kundërshtimeve të saj të vazhdueshme.
Në dëshmi, Lively shpjegon se i kishte bërë të qartë Baldonit se në katër lindjet e saj personale nuk kishte qenë kurrë lakuriq dhe se kishte kërkuar që personazhi i saj të mbante një rrobë spitali, duke qenë se skena zhvillohej në ambient spitalor. Megjithatë, sipas saj, presioni vazhdoi.
Aktorja thotë se në fund u ndje e detyruar të bënte kompromis dhe pranoi të ishte lakuriq nga gjoksi poshtë, një marrëveshje që, sipas saj, nuk ishte diskutuar dhe as miratuar më parë.
Ajo përshkruan se xhirimet e skenës zgjatën disa orë, gjatë të cilave qëndronte e shtrirë në shtratin e spitalit, me këmbët e hapura në mbështetëse, ndërsa persona të ndryshëm kalonin pranë saj.
E vetmja mbulim që kishte, sipas dëshmisë, ishte një rrobë spitali e vendosur “strategjikisht” dhe një copë shumë e vogël pëlhure e zezë për të mbuluar organet gjenitale.
Lively shton se produksioni e filmoi skenën nga kënde të shumta, përfshirë pamje ballore dhe anësore, duke e bërë situatën edhe më të vështirë për të.
Ajo pretendon gjithashtu se gjatë të njëjtës ditë xhirimesh mësoi se aktori që luante rolin e mjekut obstetër-gjinekolog ishte një mik personal i Baldonit dhe se ky person pozicionohej vazhdimisht shumë pranë saj, midis këmbëve të saj, ndërsa ajo ishte pothuajse e zhveshur.
Çështja ka shkaktuar reagime të forta në rrjetet sociale dhe në industrinë e filmit, duke ringritur debatin mbi kufijtë profesionalë, intimitetin në sheshxhirim dhe mbrojtjen e aktorëve gjatë realizimit të skenave të ndjeshme.
