Një dirigjent i famshëm rus lejoi protestuesit e klimës që ndërprenë një performancë në një festival të muzikës klasike në Zvicër t’i drejtohen turmës, pavarësisht ankesave nga disa anëtarë të audiencës. Vladimir Jurowski, drejtor i Operës Shtetërore të Bavarisë, “bëri një marrëveshje” të premten me dy protestues nga Renovate Switzerland, një grup fushatash mjedisore që po shtyn qeverinë zvicerane të shpallë një krizë klimatike, në një moment që u kap në video.
Protestuesit hynë në skenë ndërsa orkestra po luante pjesën e tretë të simfonisë së katërt të Bruckner, sipas një njoftimi për shtyp nga grupi, dhe Jurowski u përgjigj duke u dhënë atyre mundësinë për të folur. Jurowski, gjatë performancës në Festivalin e Lucernit, tha:
Ne kemi bërë një marrëveshje: Të rinjtë thonë fjalën e tyre tani. Të gjithë dëgjojmë pa komentuar. Unë u premtova atyre, u dhashë fjalën time të nderit, se nuk do të kishte koment. I lamë të përfundojnë dhe më pas na lanë të luajmë lëvizjen e katërt. Kjo ishte marrëveshja. Ju lutem më ndihmoni.
Më pas një nga aktivistët filloi të flasë. Ndërsa të bërtiturat dhe fishkëllimat dëgjohen nga audienca, aktivistja tha:
Anthony dhe unë jemi këtu sot sepse jemi shumë të shqetësuar. Na vjen shumë keq që duhet ta ndërpresim këtë koncert. Por ne kemi një emergjencë klimatike, të cilën me të vërtetë duhet ta trajtojmë.
Dirigjenti mori në kontroll situatën dhe tha:
Ndalo! Lërini të flasin. Lërini të flasin një herë dhe pastaj do të luajmë simfoninë tonë. Përndryshe, unë do të largohem nga skena tani. Dhe nëse nuk i lini të mbarojnë, atëherë unë e kam thyer fjalën.
Pas ndërhyrjes së tyre të shkurtër, dy aktivistët u larguan nga skena, sipas një njoftimi për shtyp nga Renovate Switzerland.
