Pavarësisht sukseseve të mëdha në skenën ndërkombëtare, këngëtarja me origjinë shqiptare, Dua Lipa, vazhdon të mbajë të gjalla lidhjet me vendlindjen.
Artistja është rikthyer në Shqipëri për të kaluar festën e Pashkëve, duke zgjedhur jugun e vendit si destinacionin e saj të pushimit.
E shoqëruar nga partneri i saj, aktori britanik Callum Turner, Dua ka ndarë momente të veçanta në rrjetet sociale, ku shihet duke shijuar ditët me diell dhe natyrën shqiptare.
Në postimin e saj në Instagram, ajo ka shkruar thjesht:
Pashkët në shtëpi
– duke treguar se ndjehet gjithmonë si në shtëpi kur kthehet në trojet shqiptare.
Në disa nga fotografitë, këngëtarja e hitit “Levitating” shihet duke marrë rreze dielli, ndërsa temperaturat e larta i kanë krijuar kushte ideale për relaks dhe argëtim.
Kujtojmë se në vitin 2022, Dua Lipa mori nënshtetësinë shqiptare, një moment që u prit me shumë entuziazëm nga publiku shqiptar.
Ajo gjithashtu ishte prezente në Kosovë në gusht të vitit të kaluar, ku mori pjesë në festivalin “Sunny Hill”, të cilin e organizon së bashku me të atin, Dukagjin Lipa.
Vizitat e saj në Shqipëri janë gjithmonë një lajm i bukur për fansat shqiptarë, të cilët krenohen me arritjet e saj në skenën muzikore botërore.
