Taylor Momsen ka përjetuar një incident të pazakontë gjatë turneut të saj në Meksikë, duke përfunduar në spital pasi u pickua nga një merimangë helmuese.
Artistja, e cila po performon me grupin e saj “The Pretty Reckless” si pjesë e turneut ku shoqëron legjendat e rock-ut AC/DC, ndau vetë lajmin me ndjekësit përmes rrjeteve sociale.
Momsen publikoi foto të këmbës së dëmtuar, duke treguar se pickimi i kishte shkaktuar një reagim të fortë në organizëm. Ajo u detyrua të kërkonte ndihmë mjekësore urgjente dhe kaloi një natë në spital, ku mori trajtimin e nevojshëm.
Sipas saj, situata ishte serioze, por u menaxhua falë ndërhyrjes së shpejtë të mjekëve.
Pavarësisht gjendjes shëndetësore dhe dhimbjeve, këngëtarja nuk anuloi angazhimet e saj artistike. Ajo konfirmoi se mori një injeksion përpara një performance në Mexico City dhe arriti të ngjitej në skenë, duke vazhduar turneun sipas planit.
Ky nuk është incidenti i parë i pazakontë për Momsen gjatë koncerteve. Më herët, ajo kishte tërhequr vëmendjen e mediave ndërkombëtare pasi u pickua nga një lakuriq nate gjatë një performance në Spanjë.
Ngjarja e fundit ka ngjallur reagime të shumta nga fansat, të cilët kanë shprehur shqetësim për shëndetin e saj, por edhe mbështetje për përkushtimin e saj ndaj muzikës dhe publikut.
