Fansat e Harry Styles janë futur në një gjendje euforie pasi kanë zbuluar një detaj misterioz që lë të kuptohet se këngëtari mund të jetë shumë pranë shpalljes së albumit të tij të ri.
Pas përfundimit të turneut botëror Love On Tour në vitin 2023, Harry është tërhequr nga vëmendja publike, duke i lënë fansat në pritje të ethshme për muzikë të re. Por këtë të hënë, ndjekësit më të vëmendshëm vunë re një shenjë që ndezi menjëherë spekulimet.
Bëhet fjalë për një faqe të re interneti, e shfaqur nën adresën webelongtogether.co, e cila përmban një video me një turmë fansash duke ndjekur një koncert.
Në fund të faqes shfaqet një përshkrim ligjor i Sony Music Entertainment, shtëpia diskografike e Harry Styles, çka i bindi fansat se nuk bëhet fjalë për rastësi.
Ata që klikojnë në faqen kryesore udhëzohen të dërgojnë një mesazh me tekst në një numër telefoni të regjistruar si “HSHQ”, me mesazhin: “We belong together”.
Kjo frazë u duk menjëherë e njohur për fansat, pasi është e njëjta që u shfaq në fund të një videoje të publikuar nga Harry në fund të vitit të kaluar, ku ai performonte instrumental të këngës Forever, Forever gjatë koncertit të fundit të Love On Tour në Itali.
Paralelisht me këtë, fansat kanë vënë re edhe ndryshime në faqen zyrtare të Harry Styles, e cila tani u kërkon ndjekësve të regjistrohen me të dhënat e tyre.
Ndërkohë, postera me shprehjen “We Belong Together” janë parë në qytete të ndryshme të botës, përfshirë Romën, Mançesterin dhe São Paulon.
Siç pritej, këto sinjale ndezën menjëherë rrjetet sociale.
Në platformën X (ish-Twitter), fansat kanë shpërthyer me komente entuziaste, duke shprehur bindjen se albumi i katërt, i njohur tashmë si HS4, është shumë pranë.
Daily Mail raporton se Harry Styles është rikthyer në studio, ku po punon në një album të ri “top sekret”, që pritet të jetë projekti i tij më emocional deri më tani.
Këngëtari është parë duke hyrë në studiot e njohura RAK në Londër, të themeluara në vitin 1976 nga producenti legjendar Mickie Most.
Albumi i tij i fundit, Harry’s House, u publikua në vitin 2022 dhe i solli atij suksese të mëdha, përfshirë çmimin Grammy për Albumin e Vitit dhe Brit Award për Albumin më të Mirë.
Deri tani, përfaqësuesit e Harry Styles nuk kanë dhënë asnjë koment zyrtar, por për fansat, mesazhi duket i qartë: rikthimi i tij muzikor mund të jetë vetëm çështje kohe.
