Supermodelja e njohur, Hailey Bieber në një intervistë për ‘Vogue Australia’ foli për jetën nën vëmendjen e vazhdueshme të publikut dhe për mbështetjen që merr nga bashkëshorti i saj, Justin Bieber. Ajo tha se të jetosh nën presionin e mediave dhe opinionit publik nuk bëhet kurrë plotësisht më e lehtë, edhe pse me kohën mëson ta përballosh më mirë. Sipas saj, fakti që është e martuar me dikë që e kupton këtë presion është një burim i madh ngushëllimi.
Hailey theksoi gjithashtu se i ndihmon shumë të flasë me miq që janë në të njëjtën situatë, si Kendall dhe Kylie Jenner, sepse njerëzit që nuk e kanë përjetuar këtë jetë e kanë të vështirë ta kuptojnë. Ajo ka folur edhe për jetën familjare, duke treguar se ajo dhe Justin ndajnë përgjegjësitë si prindër për djalin e tyre Jack Blues.
Ndërsa Hailey ishte në Australi për punë, Justin po kujdesej për djalin në shtëpi. Sipas saj, një partner i mirë dhe ndarja e përgjegjësive janë shumë të rëndësishme. Përveç kësaj, ata kënaqen edhe kur bashkëpunojnë në projekte, sepse e shohin si diçka argëtuese që mund ta bëjnë së bashku, duke kombinuar dashurinë dhe punën.
Bieber ka reflektuar së fundmi mbi emergjencën shëndetësore që përjetoi disa vite më parë, duke treguar se ajo ndryshoi rrënjësisht mënyrën si kujdeset për trupin dhe shëndetin e saj. Gjatë episodit të podcast-it Therapuss, me influencerin Jake Shane, 29-vjeçarja foli hapur për mini-goditjen në tru që pësoi në vitin 2022.
“Jam bërë e fiksuar pas mjekësisë,” u shpreh ajo, duke treguar se përvoja e bëri shumë më të vetëdijshme për shëndetin. Ajo kujtoi se fillimisht u dërgua në spital me simptoma të ngjashme me goditjen në tru, të shkaktuara nga një mpiksje gjaku në tru. Më vonë, mjekët konfirmuan se kishte pësuar një TIA (Transient Ischemic Attack), e njohur si mini-goditje në tru.
