Në muajt e parë në një punë të re, mund t’ju jepet një detyrë që duket e thjeshtë: të përgatisni një prezantim, të analizoni një bazë të dhënash ose të hartoni një përgjigje. Hapni një mjet të IA-së, pyesni si bëhet dhe brenda pak sekondash merrni një përgjigje të qartë e të strukturuar.
Puna mund të përfundojë më shpejt dhe madje të duket më e rregullt. Por, për zhvillimin e karrierës, ky reagim i parë mund të mos jetë zgjedhja më e mirë.
Një anketë e fundit nga Clarify Capital tregon se gjithnjë e më shumë punonjës po u drejtohen mjeteve të IA-së para se të kërkojnë udhëzim nga menaxherët. Kjo është e kuptueshme: IA-ja është e menjëhershme, nuk gjykon dhe është e disponueshme në çdo orë.
Ajo e heq bezdinë e të bërit pyetje, sidomos kur je i ri në rol, i pasigurt ose duke u përpjekur të provosh veten. Por në vendin e punës, suksesi nuk varet vetëm nga përgjigjja e saktë, por nga përgjigjja e duhur për këtë situatë, me këta njerëz dhe në këtë moment.
Dy persona mund të marrin të njëjtën kërkesë dhe të dorëzojnë punë po aq të mira, por njëri mund të shihet si i përshtatur me nevojën, ndërsa tjetri si jashtë objektivit. Shpesh, diferenca nuk është teknike, por lidhet me kuptimin e qëllimit të vërtetë të punës në një panoramë më të gjerë.
Këtu IA-ja ka kufijtë e saj. Mund t’ju tregojë si të strukturoni një prezantim, por jo se drejtuesi që e ka kërkuar preferon shkurtësinë dhe jo hollësitë.
Mund t’ju ndihmojë të hartoni një përgjigje, por jo të kuptoni ndjeshmëritë politike apo peshën që ka një detyrë për shkak të personit që e kërkon.
Për profesionistët në fillim të karrierës, rreziku është që IA-ja të zëvendësojë pikërisht ndërveprimet nga të cilat mësohet se si funksionon realisht puna.
Në vend që të pyesni një koleg si t’i qaseni një detyre, pyesni IA-në. Në vend që të verifikoni supozimet me menaxherin, përmirësoni vetëm produktin final.
Puna mund të duket e fortë, por boshllëku shfaqet kur keni bërë gjithçka “siç duhet” dhe sërish rezultati nuk pritet si mendonit.
Aftësitë që IA-ja nuk zëvendëson janë gjykimi, kuptimi i kontekstit dhe aftësia për të lundruar në marrëdhënie, interesa dhe dinamika organizative.
Këto nuk mësohen nga një mjet, por nga bisedat me njerëzit. IA-ja mund t’ju ndihmojë të ekzekutoni punën, por nuk ju mëson si të orientoheni në të.
Prandaj, mënyra më e mirë për ta përdorur është si pikënisje: përdoreni për t’u përgatitur, pastaj çojeni mendimin në bisedë, kërkoni kontekst dhe testoni supozimet.
Në një botë ku përgjigjet janë të bollshme, ajo që ju dallon është aftësia për të bërë pyetje më të mira, për të sfiduar supozimet dhe për të kuptuar çfarë fshihet poshtë vetë detyrës. Kjo është ajo që ju bën të vlefshëm në punë. / shqip.al
