Ish-partnerja e Brooklyn Beckham, Afton McKeith, ka dalë hapur në mbështetje të tij pas deklaratave të bujshme që ai bëri së fundmi ndaj prindërve të tij të famshëm, David dhe Victoria Beckham, duke ndezur debat të madh në media dhe rrjete sociale.
Aktorja 25-vjeçare, e cila ka qenë në një lidhje me Brooklyn disa vite më parë, pohon se ai nuk po fliste nga impulsi, por po shprehte një realitet që e kishte mbajtur brenda për shumë kohë.
Në një intervistë për The Sun, McKeith theksoi se tensionet nuk janë krijuar brenda natës.
Shumë nga kjo ka qenë duke u grumbulluar për vite me radhë. Nuk është diçka që ndodhi papritur
-u shpreh ajo.
Sipas saj, Brooklyn ka vuajtur prej vitesh nga ankthi dhe presioni ekstrem i të qenit gjithmonë nën vëzhgim publik, duke ndjerë se çdo hap i tij gjykohej dhe se bota po priste momentin që ai të gabonte.
Brooklyn po thoshte të vërtetën në postimin e tij. Ai e pati shumë të vështirë rritjen
-shtoi McKeith, duke pranuar se, edhe pse çdo histori ka dy anë, jeta nën “mikroskop” ishte veçanërisht e rëndë për të.
Afton la të kuptohet gjithashtu se prindërit e tij mund ta kishin mbrojtur më shumë nga presioni i famës dhe pesha e mbiemrit Beckham.
Ajo kujtoi se Brooklyn shpesh ndihej i parehatshëm nga vëmendja e vazhdueshme e paparacëve dhe bezdisej kur fotografohej pa pushim.
Në intervistë, ajo zbuloi edhe një anë më të ndjeshme të tij, duke thënë se Brooklyn e kishte të vështirë faktin që prindërit ishin shpesh larg për shkak të angazhimeve profesionale. Edhe pse kishte dado dhe vëllezër pranë, ai ndonjëherë ndihej i vetmuar.
Deklaratat e Afton McKeith shtojnë edhe më shumë peshë te rrëfimi i Brooklyn Beckham, duke hedhur dritë mbi anën e errët të rritjes në një familje ikonike, ku fama dhe presioni publik shpesh mbizotërojnë mbi qetësinë personale.
