Kryediplomatja europiane, Kaja Kallas, tha se Bashkimi Europian po shqyrton mundësinë e ndërmarrjes së masave për të siguruar hapjen e Ngushticës së Hormuzit, një nyje strategjike për transportin e naftës dhe gazit natyror.
Referuar situatës së krijuar nga mbyllja e ngushticës, Kallas tha se me Sekretarin e Përgjithshëm të OKB-së, Antonio Guterres, diskutoi idenë e një marrëveshjeje të ngjashme me atë që lejonte transportin e grurit nga Ukraina gjatë luftës, e njohur si “Nisma e Detit të Zi”.
Mbylljen e ngushticës, zyrtarja e lartë europiane e përshkroi si “veçanërisht të rrezikshme” për furnizimin me energji në Azi, por edhe problematike për prodhimin e plehrave.
Kallas paralajmëroi:
Nëse ka mungesë plehrash këtë vit, do të ketë edhe mungesë ushqimi vitin tjetër.
Në këtë kuadër, po shqyrtohet edhe mundësia e ndryshimit të mandatit të misionit detar të BE-së në Lindjen e Mesme, “Aspides”, i cili aktualisht është i fokusuar në mbrojtjen e anijeve në Detin e Kuq nga rebelët Huthi të Jemenit.
Lidhur me rezervat e shprehura nga ministri i Jashtëm gjerman, Johann Vandeful, mbi efektivitetin e misionit në Ngushticën e Hormuzit, Kallas u shpreh:
Sigurisht që duhet të kemi edhe shtetet anëtare në anën tonë. Nëse shtetet anëtare vendosin që të mos bëjmë asgjë, ky është vendimi i tyre, por ne duhet të diskutojmë se si të ndihmojmë për ta mbajtur Ngushticën e Hormuzit të hapur.
