Kim Kardashian dhe ylli i Formula 1, Lewis Hamilton, janë parë sërish bashkë, duke shtuar edhe më shumë dyshimet për një lidhje të mundshme mes tyre.
Dyshja u fotografua gjatë një darke në Nobu Malibu, një nga restorantet më të njohura buzë oqeanit, ku kaluan rreth dy orë në shoqërinë e njëri-tjetrit.
Sipas dëshmitarëve, atmosfera mes tyre ishte e ngrohtë dhe miqësore, ndërsa Hamilton u përshkrua si “shumë i sjellshëm dhe plot respekt” gjatë gjithë mbrëmjes.
Të dy u shfaqën me stil të kuruar deri në detaje: Kardashian kishte zgjedhur një kombinim elegant me bluzë rozë dhe fund të gjatë bezhë, ndërsa Hamilton u paraqit me një xhaketë bomber gri dhe pantallona të errëta.
Ata mbërritën në restorant me një makinë luksoze në edicion të kufizuar, e lidhur me stilistin e ndjerë Virgil Abloh, duke tërhequr menjëherë vëmendjen e të pranishmëve.
Kjo nuk është hera e parë që ata shihen bashkë së fundmi. Kim Kardashian dhe Lewis Hamilton janë parë edhe në Coachella, ku u fotografuan në momente më të afërta, përfshirë edhe një dalje me makinë golfi gjatë festivalit.
Hamilton, i cili më parë ka qenë në lidhje me emra të njohur si Nicole Scherzinger dhe Rihanna, thuhet se ka fituar simpatinë edhe të familjes Kardashian.
Ndërkohë, Kim, nënë e katër fëmijëve nga martesa e saj me Kanye West, vijon të jetë në qendër të vëmendjes si për jetën private, ashtu edhe për projektet e saj në televizion dhe modë.
